Batumelebi | ბათუმის საბავშვო ბაღებში სწავლა 20 იანვარს განახლდება ბათუმის საბავშვო ბაღებში სწავლა 20 იანვარს განახლდება – Batumelebi
RU | GE  

ბათუმის საბავშვო ბაღებში სწავლა 20 იანვარს განახლდება

ბათუმის საბავშვო ბაღების გაერთიანების ინფორმაციით, საბავშვო ბაღებში აღმზრდელობითი პროცესი 28 დეკემბერს შეწყდება და 2017 წლის 20 იანვარს განახლდება. გაერთიანების ხელმძღვანელის, ნატალია ზაქარეიშვილის ინფორმაციით, ხანგრძლივი არდადეგების მიზეზი მშობლების სურვილია.

„გამომდინარე იქედან, რომ ათი დღის გაცდენა ითვლება არასაპატიოდ და კანონი აღსაზრდელის გაშვებას გვავალდებულებს, მშობლების სურვილით გადავწყვიტეთ, რომ არდადეგები გაგვეხანგრძლივებინა.  ბათუმში ბავშვების დიდ ნაწილს ბრონქული პრობლემები აქვს, მშობლებს სურვილი აქვთ, ჰაერის გამოცვლის მიზნით ბავშვები  ბაკურიანში ან სხვა  კურორტებზე გაიყვანონ. გადავწყვიტეთ მშობლების თხოვნა გაგვეთვალისწინებინა,“-გვეუბნება ბაღების გაერთიანების ხელმძღვანელი.

ნატალია ზაქარეიშვილის თქმით, რადგან გასულ წელს პრობლემის წინაშე აღმოჩნდნენ, წელს მშობლების სურვილი გაითვალისწინეს.

„გასულ წელს ჩვენ დავდექით პრობლემის წინაშე, რადგან  მშობლებმა წაიყვანეს ბავშვები დასასვენებლად,  კანონი კი გვავალდებულებს, რომ ათ დღეზე მეტი გაცდენის შემთხვევაში, აღსაზრდელი გავუშვათ ბაღიდან. რადგან ჩვენ ამას ვერ გავაკეთებთ, წელს მივიღეთ გადაწყვეტილება, რომ მშობლებს ხელი შევუწყოთ“.

ნატალია ზაქარეიშვილის თქმით, ბათუმის საბავშვო ბაღებში სააღმზრდელო პროცესი, სხვა ქალაქებისგან განსხვავებით, 28 ივლისს  შეწყდება და სექტემბერში ნახლდება.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com