გუშინ აჭარის ტელევიზიის საინფორმაციო პროგრამით „ნაციონალური მოძრაობის“ წინასაარჩვენო შეხვედრა არ გაშუქებულა. კირთაძე ამბობს, რომ „ეს მოსახლეობასთან უშუალო შეხვედრა იყო და ჟურნალისტები არ მოუწვევიათ.“
კირთაძე ამბობს, რომ დღეს რობერტ ჩხაიძეს და გია ბარამიძეს აქვთ შეხვედრები, თუმცა არ დაუკონკრეტებია – სად. ჯერჯერობით ნაცმოძრაობის სპიკერს არ აქვს გადაწყვეტილი, იქნება თუ არა ამ შეხვედრების გაშუქება მედიისთვის ხელმისაწვდომი. „თუ დავუკავშირდებით, ყველას დავუკავშირდებით, მათ შორის თქვენც, თუ თქვენ არ გიკავშირდებიან, მაშინ ჩემი ბრალი ყოფილა.“ – აღნიშნა გორგი კირთაძემ.
დღეს, 20 სექტემბერს გიორგი ბარამიძე პარტიულ აქტივს სპორტულ კომპლექს „ბასკოში” შეხვდა. „ბათუმელების“ შეკითხვა, არის თუ არა სამართლიანი ბაჩო ახალიას გადადგომის მოთხოვნა, ბარამიძემ უპასუხოდ დატოვა.
გუშინ „ტვ 25″-ის პირდაპირ ეთერში, თოქ-შოუ „დიალოგში” გამართულ დებატებში მონაწილეობა სახელისუფლებო პარტიის წარმომადგენელს უნდა მიეღო. „მთელი საღამო სათუო იყო, მოვიდოდა თუ არა ნაციონალური მოძრაობა” – ამბობს „ბათუმელებთან” თოქ-შოუს პროდიუსერი ირმა ზოიძე.
„ვინაიდან ეს დებატები „ენდიაის“ ეგიდით იმართება, გადაცემა 10 დღის წინ იყო დაგეგმილი, მაგრამ გელა ცხომელიძემ კითხვები წინასწარ მოითხოვა და მიიღო პირობა, რომ ციხეში წამების ამსახველ კადრებთან მხოლოდ ერთ შეკითხვას დავუსვამდით. ჩვენ ამ პირობაზე წავედით, რომ გადაცემა არ ჩავარდნილიყო“ -აცხადებს ირმა ზოიძე.
„ახალი მემარჯვენეები“ ერთადერთი პარტია რომელმაც „ბათუმელებთან“ ღიად განაცხადა, რომ მათ წინასაარჩევნო კამპანია საქართველოში შექმნილი ვითარების გამო შეწყვიტეს და დაგეგმილი შეხვედრები გადადეს.
„ახალი მემარჯვენეების“ აჭარის რეგიონული ორგანიზაციის თავმჯდომარე პაატა მგელაძე აცხადებს, რომ წინასაარჩვნო კამპანიას დღეს საღამოს ისევ განაახლებს.
„ქრისტიან-დემოკრატიული მოძრაობის“ წარმომადგენელი ნაზიბროლა ქობულაძე აცხადებს, რომ მათ გუშინ ერთი შეხვედრა ჰქონდათ საღამოს 5 საათზე – „უბრალოდ წინასწარ იყო დაგეგმილი და აღარ გავაუქმეთ. შეხვედრამ კამერების გარეშე ჩაირა. გუშინ შექმნილი სიტუაციის გამო არ ჩავთვალეთ საჭიროდ პრესა მიგვეწვია, დილით კი ჩვენც აქციაზე ვიყავით“ – ამბობს ნაზიბროლა ქობულაძე.
„ლეიბორისტული პარტიის“ წარმომადგენელი დავით რობაქიძე კი ამბობს, რომ ბოლო დროს განვითარებულ მოვლენებს მათ წინასაარჩვნო შეხვედრებზე გავლენა არ მოუხდენია: „ჩვენი შეხვედრები დღესაც და გუშინ ჩვეულებრივ რეჟიმში მიმდინარეობს.“
კოალიცია „ქართულ ოცნების“ წარმომადგენლმა, ავთანდილ ბერიძემ თქვა, რომ გუშინ განვითარებულ მოვლენებს მათ გეგმებზე არანაირი კორექირება არ მოუხდენია: „გარდა იმისა, რომ მოგვემატა პათოსი და სასაუბრო თემა“.
კოალიცია „ქართულ ოცნებას“ დღეს სამი შეხვედრა აქვს დაგეგმილი მოსახლეობასთან.
