ქედის გამგეობის განათლების სამსახური ქედის საჯარო სკოლის მოსწავლეებისთვის ინგლისურ ენაში კონკურსს ატარებს, საჯარო სკოლების ინგლისური ენის პედაგოგებისა და უცხოელი მოხალისე მასწავლებლების თხოვნის საფუძველზე.
ინგლისური ენის კითხვის კონკურსი დაბა ქედის საჯარო სკოლაში ორ ეტაპად ჩატარდება. პირველ ეტაპზე მონაწილეობას ქედის სხვადასხვა სკოლის 120-მდე მოსწავლე მიიღებს, კონკურსის მეორე ეტაპზე მხოლოდ საუკეთესო შედეგის მქონე მოსწავლეები გადავლენ.
„ინგლისური ენის გამოცდაში მოსწავლეები შედარებით დაბალ დონეს აჩვენებენ, ამიტომაც მოსწავლეების უცხო ენით დაინტერესების მიზნით მოხალისე მასწავლებლებმა, რესურსცენტრთან ერთად, პროექტი შეიმუშავეს კონკურსის ჩასატარებლად და დასაფინანსებლად შემოიტანეს. ჩვენ პროექტი 1400 ლარით დავუფინანსეთ. კონკურსი 10 დეკემბრიდან 20 დეკემბრამდე ორ ეტაპად ჩატარდება, იქნება ინგლისური ენის წერის, კითხვისა და განხილვის კონკურსი. რაც შეეხება საკონკურსო თემატიკას, მას რესურსცენტრი მოხალისეებთან ერთად შეარჩევს,“ – ამბობს ქედის გამგეობის განათლების სამსახურის, სპორტისა და ახალგაზრდულ საქმეთა განყოფილების უფროსი მამია გვარიშვილი.
კონკურსში გამარჯვებულ მოსწავლეებს გამგეობა გადასცემს სერტიფიკატებს, ინგლისურ-ქართულ და ქართულ-ინგლისურ ლექსიკონს, ფლეშმეხსიერების ბარათსა და ადაპტირებულ ლიტერატურას ინგლისურ ენაზე დისკთან ერთად.
