„ბრწყინვალე შედეგი“ უწოდა უკრაინის პრეზიდენტმა, ვოლოდიმირ ზელენსკიმ უკრაინის შეტევას რუსეთის სტრატეგიულ სამხედრო აეროდრომებზე. ზელენსკიმ თქვა, რომ ეს სპეცოპერაცია ისტორიის წიგნებში შევა.
„მადლობა გადავუხადე გენერალ მალიუკს [ვასილ მალიუკი, უკრაინის უშიშროების სამსახურის ხელმძღვანელი] ამ წარმატებისთვის. რა თქმა უნდა, ახლა ყველაფრის თქმა არ შეგვიძლია, მაგრამ ეს აუცილებლად შევა ისტორიის წიგნებში. უკრაინა თავს იცავს და სამართლიანადაც – ჩვენ ყველაფერს ვაკეთებთ იმისათვის, რომ რუსეთმა იგრძნოს ამ ომის დასრულების აუცილებლობა“, – განაცხადა ზელენსკიმ.
მან თქვა, რომ ეს არის უკრაინის ყველაზე ხანგრძლივი სპეცოპერაცია და დაგეგმვის დაწყებიდან მის განხორციელებამდე საჭირო გახდა ერთი წელი, ექვსი თვე და ცხრა დღე.
შეგახსენებთ, რომ 1-ელ ივნისს უკრაინის უსაფრთხოების სამსახურმა რუსეთის სამხედრო აეროდრომების წინააღმდეგ დრონებით შეტევა დაიწყო, რის შედეგადაც 40-ზე მეტი სამხედრო თვითმფრინავი დაზიანდა.
მედიის ცნობით, განადგურებულ თვითმფრინავებს შორისაა სტრატეგიული ბომბდამშენები, როგორიცაა Tu-95 და Tu-22M, რომლებიც ხშირად გამოიყენება უკრაინაზე შორი დისტანციის სარაკეტო თავდასხმებისთვის.
უკრაინის უშიშროების სამსახურმა 1-ელ ივნისს რუსეთის აეროდრომებზე განადგურებული მტრის სტრატეგიული ავიაციის ღირებულება 7 მილიარდ აშშ დოლარად შეაფასა.