„თუკი ოდესმე ვინმე წლების შემდეგ იკითხავს როდის დადგა საქართველოში დიქტატურა, თამამად შეგიძლიათ უპასუხოთ, რომ ის დადგა 2025 წლის 22 მაისს, იმიტომ, რომ ზურა ჯაფარიძის საქმის მსგავსი პატიმრობები მხოლოდ და მხოლოდ დიქტატურებში ხდება. სხვა არანაირი მმართველობის პირობებში ასეთი პატიმრები ქვეყნებში არ არსებობენ,“ – ასე ეხმაურება საქართველოს თავდაცვის ყოფილი მინისტრი, ორგანიზაცია „სამოქალაქო იდეის“ ხელმძღვანელი თინა ხიდაშელი ზურა გირჩი ჯაფარიძის დაკავებას.
დღეს, 23 მაისს, მესამე სექტორმა ზურა ჯაფარიძის დაკავების საქმეზე საგანგებო ბრიფინგი მოაწყო და არალეგიტიმური პარლამენტის არაკონსტიტუციურ საგამოძიებო კომისიაზე გამოუცხადებლობის გამო „ქართული ოცნების“ რეჟიმის მიერ ოპოზიციონერი პოლიტიკოსების წინააღმდეგ გამოცხადებული დევნა შეაფასა.
„ყოველდღიურად იზრდება საქართველოში პოლიტპატიმრების ოდენობა. ყოველდღიურად ადამიანები ამ ქვეყანაში ციხეში მიდიან იმიტომ, რომ განსხვავებულად ფიქრობენ, იმიტომ, რომ აქვთ გამბედაობა დაუპირისპირდნენ რეჟიმს და არ ეგუებიან იმ ხელოვნურად შექმნილ ტყუილ ნარატივებს, რომელსაც ქართული ოცნება იგონებს.
ზურა ჯაფარიძის შემთხვევა არის პრინციპულად მნიშვნელოვანი მთელი ქართული საზოგადოებისა და საერთაშორისო თანამეგობრობისათვის, რომ განსაკუთრებული ყურადღების ცენტრში აღმოჩნდეს, იმიტომ, რომ ის არის მოქმედი პოლიტიკური ლიდერი, ეს არის კლასიკური შემთხვევა პოლიტიკური ანგარიშსწორების და პოლიტიკური პატიმრობის, იმიტომ, რომ ის არის მოქმედი პოლიტიკური ლიდერი, მოქმედი პოლიტიკური პარტიის ხელმძღვანელი და აგერ გუშინდელ დღემდე იყო საქართველოს პარლამენტის წევრი.
რომ არა მისი პრინციპული დამოკიდებულება, ის დღეს იქნებოდა საქართველოს პარლამენტის წევრი.
დღეს, ჩვენ პირველად საქართველოს ისტორიაში, ვულოცავ „ქართულ ოცნებას“, შეგვიძლია ვთქვათ, რომ მივიღეთ მოქმედი პოლიტიკოსი საქართველოს ციხეში. ასეთი რამ საქართველოში ჯერ არ მომხდარა,“ – თქვა თინა ხიდაშელმა.
ხიდაშელის თქმით, ხელისუფლებამ გადაწყვიტა მოეგონებინა დანაშაულის სცენარი, შემდეგ ამ თავის მიერ მოგონებული დანაშაულის სცენარის მიხედვით, შეარჩია მოთამაშეები, აქტორები და ახლა უკვე იწყებს მათ სათითაოდ დაპატიმრებას.
„რატომ არის ზურა ჯაფარიძის შემთხვევა სპეციფიურად განსხვავებული? კომისიის მანდატის ფარგლებში განსაზღვრულია, რომ მან უნდა გამოიძიოს ნაციონალური მოძრაობის დროს მომხდარი დანაშაული.
ზურა ჯაფარიძე არცერთი დღე, ნაციონალური მოძრაობის ხელისუფლებაში ყოფნის დროს, არ ყოფილა არათუ რაიმე თანამდებობის პირი, ის არ ყოფილა პარტია ნაციონალური მოძრაობის წევრიც კი. ის ენმ-ის ხელისუფლებაში ყოფნის დროს, ბოლო წუთამდე იყო არასამთავრობო სექტორში.
ასეთ ადამიანს იბარებენ დანაშაულებზე, რომელიც მოხდა ვიღაცის ხელისუფლებაში ყოფნის დროს, ის არ მიდის კომისიაზე, ამის გამო შემდეგ იწყებენ მის სისხლის სამართლებრივ დევნას და აგერ დღეს ის უკვე ციხეშია.
თუ ვინმე საქართველოში, სრულ ჭკუაზე მყოფი მეტყვის, რომ არსებობს რაიმე კავშირი, ენმ-ის დროს მომხდარ დანაშაულებზე, ზურა ჯაფარიძის როგორც ან მონაწილის, ან მოწმის, ან რაიმე სხვა სტატუსით დაბარების, გამოკითხვის შესახებ, ასეთივე წარმატებით, თითოეული თქვენგანი, ვინც აქ დგახართ, დედაჩემი, ჩვენი ოჯახის წევრები, ნებისმიერი მოქალაქე ამ ქვეყანაში, შეუძლია დაიბაროს თეა წულუკიანმა. პასუხად თუ მიიღებს, რომ „მე რა შუაში ვარ, არ მოვდივარ” – ჩასვას ციხეში,“ – თქვა თინა ხიდაშელმა.
თავდაცვის ყოფილი მინისტრის თქმით, სწორედ ამიტომ არის არსებული რეჟიმი სახიფათო.
„მნიშვნელოვანია ამ პატიმრობის შემდეგ ყველამ ძალიან კარგად გავაცნობიეროთ, რომ იმდენად არ არსებული შემადგენლობიდან გაჩნდა პატიმარი, რომ ნებისმიერ ადამიანს შეუძლია მოჰკიდოს რეჟიმმა ხელი, ჩასვას ციხეში და თავი ამართლებინოს შემდეგ, რომ არ გაჰყავდა გვირაბი ბომბეიდან ლონდონამდე,“ – ამბობს თინა ხიდაშელი.
„გირჩი – მეტი თავისუფლებას“ ლიდერი ზურაბ გირჩი ჯაფარიძე გუშინ, 22 მაისს, სასამართლო დარბაზში დააპატიმრეს წულუკიანის კომისიაზე არ მისვლის გამო. მან უარი თქვა, როგორც გირაოს გადახდაზე, ასევე, რეჟიმთან თანამშრომლობაზე.