ქედის, შუახევისა და ხულოს მუნიციპალიტეტებისთვის ჯამში ოთხ ახალ ავტობუსს შეიძენენ.
სატენდერო დოკუმენტაციიდან ჩანს, რომ ავტობუსებს სახელმწიფო შესყიდვების სააგენტო 38 ქალაქისა და მუნიციპალიტეტისთვის ყიდულობს [153 ავტობუსი]; აქედან ქედასა და შუახევს თითო ერთეული ავტობუსი გადაეცემა, ხულოს მუნიციპალიტეტს კი – ორი.
ქედის მუნიციპალიტეტის ცნობით, ახალი ავტობუსი ქედა-ბათუმის სამარშრუტო ხაზზე იმოძრავებს; ხულო-ბათუმის სამარშრუტო ხაზზე ივლის ხულოს ორივე ავტობუსი; შუახევში კი ახალი ავტობუსის დანიშნულება შიდამუნიციპალური გადაადგილება იქნება.
„ავტობუსი წინასწარ დაგეგმილი გრაფიკის შესაბამისად იმოძრავებს“, – გვითხრეს შუახევში.
ISUZU-ს ფირმის მწვანე ფერის ავტობუსები გათვლილია 56 მგზავრზე, სადაც 21 დასაჯდომი ადგილია და სივრცე შეზღუდული შესაძლებლობის მქონე პირის ეტლისთვის.
ავტობუსი აღჭურვილი იქნება სათანადო სახელურებით და გაჩერების მოთხოვნის ღილაკით; ასევე, მგზავრთა განყოფილების გათბობის, კონდიცირებისა და ვენტილაციის სისტემით.
თითოეული ავტობუსის ფასი 345 500 ლარია.
ქედის მუნიციპალიტეტი ასევე შეიძენს IVECO-ს ფირმის ერთ ნაგავმზიდს, რომელიც დაბის და ათივე ადმინისტრაციული ერთეულის სოფლებს მოემსახურება. ნაგავმზიდის შესაძენად ბიუჯეტიდან 430 630 ლარი გამოიყო.
სატენდერო დოკუმენტაციით, ავტობუსების საგარანტიო ვადა 24 თვეა.