სკანდინავიის ქვეყნებში ტემპერატურის მკვეთრმა დაცემამ საავტომობილო გზების პარალიზება გამოიწვია.
მედიის ცნობით, შვედეთში ბოლო 25 წლის განმავლობაში ყველაზე ცივი ღამე დაფიქსირდა, ნიშნულმა -43.6 გრადუს მიაღწია.
შვედეთის ხელისუფლების განცხადებით, ყველა ადამიანი, რომელიც 24 საათზე მეტი ხნის განმავლობაში ძლიერ თოვლში 1000-მდე მანქანაში იყო ჩარჩენილი, ევაკუირებულია.
BBC-ის ინფორმაციით, მაშველებს მთელი ღამის განმავლობაში გადაჰყავდათ ადამიანები თავიანთი მანქანებიდან.
ფინური მედიის ცნობით, ფინეთში ტემპერატურის ყველაზე მკვეთრი, -42.5 გრადუსამდე დაცემა ლაპლანდიაში დაფიქსირდა. ფინეთის მეტეოროლოგიური სამსახურის განცხადებით, -42 გრადუსზე დაბალი ტემპერატურა ამ საუკუნეში მხოლოდ სამჯერ დაფიქსირდა.
ფინმარკში [ნორვეგია] კი ერთდროულად დაფიქსირდა ქვეყანაში ყველაზე ცივი (-42.6) და თბილი (+2,7) ტემპერატურა. ადგილობრივი მედიის ცნობით, ორმა სხვადასხვა მეტეოროლოგიურმა სადგურმა, რომელთა შორის მანძილი მხოლოდ 240 კილომეტრია, ტემპერატურები 44,5 გრადუსიანი სხვაობით დააფიქსირა.
ფოტო: EPA-EFE/JOHAN NILSSON
_________________
ავტორი: ანა ბაჟუნაიშვილი
