აჭარაში მოსული უხვი ნალექის გამო, პრობლემები შეექმნა შუახევში, უჩამბის ხეობაში მცხოვრებ 320 ოჯახს. შუახევის გამგებლის ტარიელ ებრალიძის ინფორმაციით, ამ დროისთვის უჩამბაში – ევაკურებულია 4–5 ოჯახი – “დილის ცხრა საათიდან, რამდენიმე საათი გადაუღებლად წვიმდა, რამაც გამოიწვია მდინარის გუდნისწყალის ადიდება, ადიდებული მდინარე კალაპოტიდან გადმოვიდა და წაიღო ჩვენს მიერ 28 ივნისის სტიქიის შემდეგ აგებული დროებითი ხიდი, რის გამოც 320 ოჯახი ახლა ალტერნატიული შემოვლითი გზით სარგებლობს. ამჟამად 5 სოფელთან დაკავშირება მაღალი გამავლობის ავტომანქანებით შესაძლებელია. ელექტრო ენერგია ამჟამად ყველას მიეწოდება” – ამბობს ტარიელ ებრალიძე.
გარდა ამისა, წვიმის შედეგად მეწყერი ჩამოწვა სოფელ ქიძინიძეებში – ”ამჟამად მაქვს ინფორმაცია რომ სოფელ ქიძინიძეებში მეწყერი ჩამოწვა და საფრთხეს უქმნის ერთ საცხოვრებელ სახლს, სამაშველო ბრიგადა მუშაობს ადგილზე” – ამბობს ტარიელ ებრალიძე.
