უკრაინის საგარეო საქმეთა მინისტრის, დმიტრო კულებას თქმით, ევროკავშირი ვერ მოახერხებს თავისი დანაპირების შესრულებას და უკრაინისთვის 2024 წლის მარტამდე მილიონი საარტილერიო ჭურვის გადაცემას, იტყობინება „ევროპეისკა პრავდა“.
კულებას თქმით, „ბლუმბერგის“ სტატია მილიონი ჭურვის ვერგადაცემაზე სიმართლეს შეესაბამება, თუმცა ეს გამოწვეულია არა ევროკავშირის ქვეყნების პოლიტიკური ნების ნაკლებობით, არამედ ბლოკის წევრთა თავდაცვითი წარმოების ცუდი მდგომარეობით და „ძალიან ბევრი ბიუროკრატიით“.
უკრაინელმა დიპლომატმა აღნიშნა, რომ ევროკავშირმა უფრო სწრაფად უნდა იმოქმედოს პრობლემების მოსაგვარებლად და ხაზი გაუსვა, რომ კიევი, მართალია, აფასებს ბრიუსელის მხარდაჭერას, მაგრამ მაინც შეეცდება, დააჩქაროს მოკავშირე. „იმიტომ, რომ თვალწინაა უკრაინელი ქვეითი და მას ჭურვები სჭირდება“, – ამბობს იგი.
ოქტომბრის ბოლოსთვის, ლიეტუვის საგარეო უწყების ცნობით, ევროკავშირმა 300 ათასი ჭურვი გადასცა უკრაინას. მილიონი ჭურვის ერთი წლის განმავლობაში გადაცემის პირობა ევროკავშირმა 2023 წლის მარტში დადო.
