2023 წლის იანვრიდან სექტემბრის ჩათვლით საქართველოში ქალთა მიმართ ძალადობის საქმეზე 573 შემაკავებელი ორდერი გამოიწერა 1059 ადამიანზე – ასეთია შს სამინისტროს სტატისტიკა.
ყველაზე მეტი შემაკავებელი ორდერი გამოიწერა თბილისში – 324, მეორე ადგილზე კი აჭარაა, სადაც პოლიციამ 76 შემაკავებელი ორდერი გამოწერა ქალთა მიმართ ძალადობის საქმეზე 145 პირის მიმართ [შემაკავებელი ორდერი შეიძლება გამოიწეროს რამდენიმე პირზე].
აჭარაში გამოწერილი შემაკავებელი ორდერიდან 20 გამოიწერა ფიზიკური ძალადობის გამო, 63 – ფსიქოლოგიური ძალადობის, 3 – სექსუალური ძალადობის, 3 კი – იძულების გამო.
მოძალადეების უმრავლესობა კაცი იყო. 505 ორდერი სწორედ კაცების მიმართ გამოიწერა.
სტატისტიკის თანახმად, ყველაზე ხშირად ძალადობის მსხვერპლი ქალების ასაკი 25-44 წელია.
რაც შეეხება ოჯახში ძალადობის გამო გამოწერილ შემაკავებელ ორდერებს, სტატისტიკა აქ გაცილებით მაღალია. 2023 წლის იანვრიდან სექტემბრის ჩათვლით საქართველოში ოჯახში ძალადობის გამო სულ 6510 შემაკავებელი ორდერი გამოიწერა, აქიდან აჭარაში – 619.
შს სამინისტროს სტატისტიკის თანახმად, ყველაზე მეტი, 3019 შემაკავებელი ორდერი თბილისში გამოიწერა, მეორე ადგილზე კი ამ სტატისტიკაშიც აჭარაა – 2023 წლის პირველ 9 თვეში აჭარაში 619 ორდერი გამოიწერა ოჯახში ძალადობის გამო.
კანონმდებლობა შემაკავებელი ორდერის გამოცემას ითვალისწინებს მხოლოდ ორ შემთხვევაში: როდესაც ძალადობის ფაქტი ხდება ოჯახის წევრებს შორის ან როდესაც ძალადობის ფაქტი ხდება ქალთა მიმართ გენდერული ნიშნით. შემაკავებელი ორდერი 30 დღემდე ვადით გამოიცემა.