დღეს, 17 ივლისს, სახალხო დამცველი ლევან იოსელიანი ბათუმში სამოქალაქო ორგანიზაციების წარმომადგენლებს შეხვდა. ჟურნალისტებმა მას შეკითხვა პედოფილიის ბოლო შემთხვევებზე დაუსვეს: რას აკეთებს სახალხო დამცველი პედოფილიის პრევენციისთვის?
„ეს არის ნამდვილად გამოწვევა და პრობლემა. სახალხო დამცველის აპარატი მუშაობს ყველა ასეთ შემთხვევაზე და არამარტო ისეთ შემთხვევებზე, რაც გახმაურებულია, არის ისეთი შემთხვევები, რაც არ ხმაურდება. ჩვენი ბავშვთა დაცვის დეპარტამენტი არის ჩართული ყველა ამ შემთხვევის შესწავლაში და, შესაბამისად, ვართ კონტაქტზე შესაბამის უწყებებთან,“ – აღნიშნა სახალხო დამცველმა.
უნდა ფორმდებოდეს თუ არა საპროცესო შეთანხმება სექსუალურ ძალადობაში მსჯავრდებულ პირთან, როგორია ამ საკითხზე ომბუდსმენის დამოკიდებულება? – ჰკითხა „ბათუმელებმა“ ლევან იოსელიანს. სახალხო დამცველმა კონკრეტული პოზიციის დაფიქსირებას თავი აარიდა.
„არასრულწლოვნებთან მიმართებით ბევრი ინიციატივა გვაქვს, რომელიც მიმართულია მათი უფლებების სამომავლოდ დაცვასა და გაუმჯობესებაზე. სისხლის სამართლის კოდექსში არსებული სასჯელი საკმაოდ მკაცრია გაუპატიურების მუხლთან დაკავშირებით, მაგრამ სასჯელის სიმკაცრე არ არის საკმარისი, ბავშვზე მორგებული კანონმდებლობა კიდევ უფრო უნდა დაიხვეწოს.
სასამართლოს კონკრეტულ გადაწყვეტილებას მე ვერ შევაფასებ. როდესაც საქმე ეხება ბავშვებს, ყველას, მოსამართლიდან დაწყებული, რიგითი მოქალაქით დამთავრებული, გვმართებს განსაკუთრებული პასუხისმგებლობა და ყურადღება, რომ ჩვენს მიერ მიღებული გადაწყვეტილება ემსახურებოდეს მხოლოდ ბავშვების საუკეთესო ინტერესებს და არ იყოს ბავშვის ინტერესების საწინააღმდეგო. ამიტომ ყველას მოვუწოდებ, როცა განიხილავენ ბავშვის შესახებ საქმეებს, სასამართლოში იქნება, თუ სხვა შემთხვევაში, იხელმძღვანელონ სწორედ ბავშვის საუკეთესო ინტერესებით,“ – გვიპასუხა ლევან იოსელიანმა.
სახალხო დამცველს შევახსენეთ, რომ კონკრეტულ ჯგუფებს აქამდე და ახლაც პედოფილიის კუთხით არაერთხელ მიმართეს პარლამენტს, რომ შეიცვალოს კანონმდებლობა და სახელმწიფომ ბავშვთა უფლებების დაცვისთვის კონკრეტული ნაბიჯები გადადგას, პირველ რიგში, კანონმდებლობის დონეზე.
„მე ამაზე მაქვს პოზიცია. თუ თქვენ ჩემს პოზიციას თვლით პოზიციის არქონად, ეს თქვენი შეფასებაა,“ – გვითხრა ლევან იოსელიანმა.
სახალხო დამცველს ვუთხარით, რომ პედოფილიის საქმეებზე საპროცესო შეთანხმების გაუქმება განსაკუთრებით მას შემდეგ გააქტიურდა, როცა ცნობილი გახდა, რომ 12 წლის ბავშვზე სექსუალურ ძალადობაში მხილებულ კაცს ქუთაისის საქალაქო სასამართლომ საპროცესო შეთანხმება დაუმტკიცა და პედოფილს ერთი დღეც არ გაუტარებია ციხეში.
„კონკრეტულ გადაწყვეტილებებზე ვერ გიპასუხებთ. არ ვიცი, რა გარემოებებში მოხდა საპროცესოს გამოყენება, მაგრამ ზოგადად, როდესაც გადაწყვეტილებები ეხება ბავშვებს, ყველა გადაწყვეტილება უნდა იქნას მიღებული ბავშვის საუკეთესო ინტერესიდან გამომდინარე“, – თქვა სახალხო დამცველმა.
შესაძლოა ბავშვის საუკეთესო ინტერესი პედოფილიის რომელიმე შემთხვევაზე იყოს ის, რომ დამნაშავეს საპროცესო გაუფორმდეს და ციხეში სასჯელის მოხდა არ მოუწიოს? – ჩავეკითხეთ სახალხო დამცველს.
„ხომ გავაკეთე ამაზე კომენტარი,“ – გვიპასუხა ლევან იოსელიანმა.
