დღეს, 2 ივნისს, ბრიტანეთის თავდაცვის სამინისტროს დაზვერვა ყოველდღიურ მოკლე ანგარიშში წერს, რომ პირველ ივნისს, დილიდან, პარტიზანული ჯგუფები ბოლო ათი დღის განმავლობაში მეორედ დაესხნენ თავს ბელგოროდის ოლქს რუსეთში.
დაზვერვა წერს, რომ რუსეთის სამხედრო და შინაგან საქმეთა ძალებმა, სავარაუდოდ, უფრო სწრაფად და წარმატებულად შეძლეს ამ თავდასხმის შეკავება, ვიდრე წინა ჯერზე.
„თუმცა, რუსეთის თავდაცვის სამინისტროს პრესრელიზის მიხედვით, რუსეთმა დაიწყო საკუთარ ტერიტორიაზე ცეცხლსასროლი ძალების სრული დიაპაზონის განლაგება, მათ შორის – თავდასხმითი ვერტმფრენებისა და მძიმე თერმობარული რაკეტების – TOS-1A-ის.
რუსი მეთაურები ახლა მწვავე დილემის წინაშე დგანან, გააძლიერონ თავდაცვა რუსეთის სასაზღვრო რეგიონებში, თუ გააძლიერონ თავიანთი ხაზები ოკუპირებულ უკრაინაში“ – წერს ბრიტანული დაზვერვა.
უკრაინული მხარე აცხადებს, რომ ბელგოროდში არა უკრაინის შეიარაღებული ძალების ნაწილები, არამედ ლეგიონი „რუსეთის თავისუფლება“ მოქმედებს [ლეგიონში რუსები არიან გაწევრიანებული და იბრძვიან უკრაინის მხარეს]. პრეზიდენტ ზელენსკის ადმინისტრაციაშიც თქვეს, რომ მიმდინარე მოვლენებთან უკრაინას უშუალო შეხება არ აქვს.
