უკრაინის თავდაცვის სამინისტროს მთავარი სადაზვერვო სამმართველოს ხელმძღვანელმა კირილ ბუდანოვმა განაცხადა, რომ უკრაინელმა ხალხმა მნიშვნელოვანი წვლილი შეიტანა ნაციზმზე გამარჯვებაში 1945 წელს და დაამარცხებს რაშიზმსაც.
ტერმინი „რაშიზმი“ უკრაინის რადამ 2 მაისს დააკანონა – ამ ტერმინით უკრაინა უკვე სამართლებრივადაც აღნიშნავს რუსულ ფაშიზმს.
„რუსული ურდო დაიხრჩობა თავისი ჯარისკაცების სისხლში უკრაინის მიწაზე! რადგან მსოფლიოში ვერც ერთი არმია ვერ დაამარცხებს ერს, რომელსაც აქვს სიცოცხლის უკვდავი ნება, ურღვევი სიმტკიცე და ჰყავს ძლიერი, მამაცი არმია!“ – ციტირებს ბუდანოვის მიმართვას „უკრაინსკაია პრავდა“.
ბუდანოვის თქმით, რუსეთმა თავისი იმპერიული პროექტი „უკრაინის ისტორიის“ დასასრულად მიიჩნია, მაგრამ ბრძოლის ველზე უკრაინელების უპრეცედენტო გამბედაობას, თავდადებას, პროფესიონალიზმსა და უკრაინელი ხალხის ტოტალურ, ყოვლისმომცველ წინააღმდეგობას შეხვდა.
ბუდანოვმა აღნიშნა, რომ 8 მაისს უკრაინა აღნიშნავს ხსოვნისა და შერიგების დღეს:
„ამ დღეს პატივს ვცემთ უკრაინელი ხალხის ღვაწლს, მათ გამორჩეულ წვლილს ანტიჰიტლერული კოალიციის გამარჯვებაში, გამოვხატავთ პატივისცემას და მადლიერებას ნაციზმის წინააღმდეგ მებრძოლების მიმართ“.
დღეს, 8 მაისს, ცნობილი გახდა, რომ პრეზიდენტმა ვოლოდიმირ ზელენსკიმ ხელი მოაწერა განკარგულებას, რომლითაც უკრაინა ნაციზმზე გამარჯვებას 9 მაისის ნაცვლად 8 მაისს აღნიშნავს. 9 მაისს კი უკრაინაში ამიერიდან აღნიშნავენ „ევროპის დღეს“ – ყველა იმ ევროპელის ერთობის დღესასწაულს, ვინც ნაციზმი დაამარცხა.
