უკრაინის სახელმწიფო სასაზღვრო სამსახურის ცნობით, ბახმუტის მცველმა მესაზღვრეებმა 11 აპრილს, ღამით „ვაგნერის“ თავდასხმა მოიგერიეს.
უკრაინული მხარის ცნობით, 20-ზე მეტმა „ვაგნერელმა“ სცადა ფარულად მიახლოებოდა მესაზღვრეების პოზიციებს ბახმუტში და თავს დასხმოდნენ მათ.
უკრაინელმა მესაზღვრეებმა სადამკვირვებლო პუნქტიდან „ვაგნერელები“ შენიშნეს და ცეცხლი გაუხსნეს მათ.
შეტაკების დროს „ვაგნერელები“ დანგრეულ შენობებში იმალებოდნენ, უკრაინელმა მებრძოლებმა მანევრირების შედეგად ერთ-ერთ შენობას შეუტიეს და მოწინააღმდეგეების ნაწილის განადგურება შეძლეს, ნაწილი კი – გაიქცა.
უკრაინის სახელმწიფო სასაზღვრო სამსახური წერს, რომ რუსულმა მხარემ 19 ადამიანი დაკარგა, მათგან 7 დაიღუპა.
უკრაინის ქალაქ ბახმუტში 8 თვეა მიმდინარეობს მძიმე ბრძოლები. რუსების მცდელობის მიუხედავად, ისინი ვერ ახერხებენ ქალაქის აღებას, რომელშიც დაახლოებით 70 ათასი ადამიანი ცხოვრობდა.
____________
ფოტოზე: უკრაინელი ჯარისკაცი სამხედრო პოზიციაზე ბახმუტის გარეუბანში.
ფოტო: EPA-EFE/OLEG PETRASYUK
