ბრიტანეთის დაზვერვის ანალიტიკოსები დღევანდელ ანგარიშში აღნიშნავენ, რომ რუსები შესამჩნევად გააქტიურდნენ და ბახმუტის ცენტრისკენ დაიძრნენ. მათ ასევე აიღეს მდინარე ბახმუტკას დასავლეთ სანაპირო.
დაზვერვის ინფორმაციით, მსგავსი აქტივობა არ შეინიშნებოდა მარტის ბოლოდან, მაშინ მათ ბახმუტისთვის ბრძოლებში წინსვლა ძირითადად შეჩერებული ჰქონდათ. რუსეთის საოკუპაციო ძალები ბოლო დღეებში გააქტიურდნენ.
ბრიტანეთის დაზვერვის ბოლო მიმოხილვაში ანალიტიკოსები აღნიშნავენ, რომ რუსებმა მიაღწიეს გარკვეულ წინსვლას – დაწინაურდნენ ქალაქის ცენტრისკენ და აიღეს მდინარე ბახმუტკას დასავლეთი სანაპირო. როგორც დაზვერვა აღნიშნავს, მსგავსი ვითარების გამო ქალაქის დასავლეთით უკრაინის შეიარაღებული ძალების მომარაგების ძირითად მარშრუტს, სავარაუდოდ, სერიოზული საფრთხე ემუქრება.
„რუსეთის რეგულარულმა ძალებმა, მათ შორის, საჰაერო-სადესანტო ჯარების ჩართულობამ, სავარაუდოდ, გააძლიერა ბრძოლის ეს რაიონი და რუსეთი ამ სექტორში ისევ ეფექტიანად იყენებს არტილერიას“, – ნათქვამია ბრიტანეთის დაზვერვის დღევანდელ ანგარიშში.
_____
უკრაინის ქალაქ ბახმუტში დიდი ხანია მიმდინარეობს მძიმე ბრძოლები. რუსების მცდელობის მიუხედავად, ისინი რამდენიმე თვეა ვერ ახერხებენ ქალაქის აღებას, რომელშიც დაახლოებით 70 ათასი ადამიანი ცხოვრობდა. უკრაინულ მხარეს გადაწყვეტილი აქვს, ბოლომდე დაიცვას ეს პატარა ქალაქი.
ცნობილია, რომ ამ დღეებში რუსებმა მოახერხეს ბახმუტის მერიის შენობის დაკავება და ქალაქის ცენტრისკენ წინსვლას აგრძელებენ.
