ნინი კაკაბაძისა და ელენე კურტანიძის პროექტი – „100 წერილი ბსუს“, ბათუმის შოთა რუსთაველის უნივერსიტეტის სტუდენტური პროექტების კონკურსის გამარჯვებულია. პროექტს უნივერსიტეტი 3 -4 ათასი ლარის ფარგლებში დააფინანსებს.
ელენე კურტანიძე 23 წლისაა. მან ბსუ-ში გასულ წელს დაამთავრა საბუნებისმეტყველო მეცნიერებათა და ჯანდაცვის ფაკულტეტზე სწავლა. ფიქრობს, რომ „100 წერილი ბსუს“ წიგნად იქცევა, რომელშიც ბსუ-სთან დაკავშირებული, სხვადასხვა თაობისა და პროფესიის ადამიანების ისტორიები გაერთიანდება.
ტურიზმის ფაკულტეტის მეოთხეკურსელია ნინი კაკაბაძე. მისი თქმით, ამ წერილებს საბოლოოდ წიგნის სახე მიეცემა და 50 ეგზემპლარი დაიბეჭდება ქართულ და ინგლისურ ენებზე.
ასევე, შეიქმნება კრებულის ელექტრონული ვერსიაც და ყველა დაინტერესებულ ადამიანს, განსაკუთრებით კი აბიტურიენტებს, შეეძლებათ მას გაეცნონ.
პროექტის დაწყება მაისიდან იგეგმება, წიგნის პრეზენტაცია კი – ნოემბერში.
„გვინდა, რომ უნივერსიტეტის და მისი კურსდამთავრებულების განვლილ გზაზე გავაკეთოთ აქცენტი, ამიტომ წიგნი სხვადასხვა ასაკის ბსუ-ს კურსდამთავრებულების წერილებს გააერთიანებს“ – გვითხრა ნინიმ.
მან გვითხრა ელექტრონული ფოსტის მისამართიც – 100lettersbsu@gmail.com, სადაც თქვენც შეგიძლიათ წერილი გაუგზავნოთ ბსუ-ს.
