აჭარაში სოციალურად დაუცველი ორსულებისა და მათი პარტნიორებისთვის ამოქმედდა ახალი პროგრამული ღონისძიება – „მშობელთა სკოლა ორსულთა ფიზიკური და ფსიქოლოგიური ჯანმრთელობისთვის“.
პროგრამის ფარგლებში, ორსულობის პერიოდის სწორად წარმართვის მიზნით, ბენეფიციარ ორსულებს და/ან მათ მეუღლეებს სასწავლო/საინფორმაციო კურსის სახით 6 ინტერაქციული გაკვეთილი ჩაუტარდებათ.
სასწავლო კურსის ბენეფიციარებს შეხვდებიან სხვადასხვა სპეციალისტები, მათ შორის: მეან-გინეკოლოგი, ნეონატოლოგი, ფსიქოლოგი და ფიზიკური თერაპევტი.
„მშობელთა სკოლა ითვალისწინებს ორსულთა განათლებას ჩასახვიდან მშობიარობის ბოლომდე, ასევე ახალშობილობის და ლოგინობის ხანის პერიოდს, სადაც ორსულები შეისწავლიან აქტივობებს, მოვლის თავისებურებებს და ა.შ.” – ამბობს დალი დავითაძე, საოჯახო მედიცინის რეგიონული ცენტრის დირექტორი.
პროგრამით სარგებლობა შეუძლიათ აჭარაში რეგისტრირებულ, „დედათა და ბავშვთა ჯანმრთელობის“ სახელმწიფო პროგრამის ანტენატალური მეთვალყურეობის კომპონენტით მოსარგებლე ორსულებს/ან მათ მეუღლეებს, რომლებიც დარეგისტრირებულნი არიან სოციალურად დაუცველი ოჯახების ერთიან მონაცემთა ბაზაში 0-დან 200 000-ის ჩათვლით სარეიტინგო ქულით; ასევე თუ ორსული ან მეუღლე არის შეზღუდული შესაძლებლობის მქონე პირი.
აჭარის საზოგადოებრივი ჯანდაცვის ცენტრის ცნობით, მშობელთა სკოლა ფუნქციონირებს შემდეგ დაწესებულებებში: შპს საოჯახო მედიცინის რეგიონული ცენტრი; შპს ირის ბორჩაშვილის სახელობის ჯანმრთელობის ცენტრი „მედინა“; მ. იაშვილის სახელობის ბათუმის დედათა და ბავშვთა ცენტრალური ჰოსპიტალი; შპს „BROTHERS“ – ბათუმის საერთაშორისო ჰოსპიტალი და შპს ბათუმის სამედიცინო ცენტრი.
ფოტო: აჭარის ჯანდაცვის სამინისტრო