გაერთიანებული სამეფოს დაზვერვა 22 თებერვლის ანგარიშში 21 თებერვალს რუსეთის პრეზიდენტის, ვლადიმერ პუტინის, საპარლამენტო გამოსვლას განიხილავს. როგორც ანგარიშშია აღნიშნული, ეს 2021 წლის შემდეგ პუტინის პირველი მსგავსი სიტყვა იყო და ამ გამოსვლისას მან ნათლად განმარტა, რომ უკრაინაში „სპეციალური სამხედრო ოპერაციის“ გაგრძელებას აპირებს.
ერთ-ერთი აქცენტი პუტინის სიტყვიდან, რომელსაც უწყება გამოყოფს, არის რუსეთის მიერ „ახალი სტრატეგიული შეიარაღების შემცირების შეთანხმების“ [New START] შეჩერება. ასევე პუტინის მიერ დასავლეთის ელიტების, როგორც „ტოტალურად უპრინციპო ტყუილების სიმბოლოდ“ დახასიათება.
New START-ი არის ბირთვული იარაღის შემცირების ხელშეკრულება შეერთებულ შტატებსა და რუსეთის ფედერაციას შორის, რომლის სახელწოდებაა „სტრატეგიული შეტევითი იარაღის შემდგომი შემცირებისა და შეზღუდვის ზომები“. ხელშეკრულება ძალაში 2011 წელს შევიდა, ხოლო ბაიდენის გაპრეზიდენტების შემდეგ, 2021 წელს, დამატებით 5 წლით გაგრძელდა. ხელშეკრულება ზღუდავს განლაგებული სტრატეგიული ბირთვული ქობინების დასაშვებ რაოდენობას 1,550-მდე და ინსპექტირების შესაძლებლობას უტოვებს მხარეებს.
როგორც ბრიტანეთის დაზვერვა წერს, პუტინმა თავის გამოსვლაში შეინარჩუნა საბრძოლო ტონი, რომელსაც ბოლო 6 თვეა იყენებს, თუმცა არ გაუცხადებია რაიმე პრაქტიკული ზომები, რამაც შეიძლება შეამსუბუქოს ბრძოლის ველზე არსებული ჩიხი, რომლის წინაშეც დგას რუსეთი.
„პუტინი აგრძელებს ურთიერთსაპირისპირო ნარატივების წარმოდგენას და ერთი მხრივ, საუბრობს არსებულ მძიმე გამოწვევებსა და დროზე, მეორე მხრივ კი კვლავაც ამტკიცებს, რომ რუსეთში ყველაფერი მშვენივრადაა და გეგმის მიხედვით მიდის. ეს ორივე გზავნილს არაეფექტურს ხდის“, – ვკითხულობთ გაერთიანებული სამეფოს დაზვერვის 22 თებერვლის ანგარიშში.
