გაერთიანებული სამეფოს დაზვერვა 30 იანვრის ანგარიშში რუსეთში „ნაწილობრივი მობილიზაციის“ ფარგლებში „გამოძახების“ კიდევ ერთი რაუნდის შესაძლებლობას მიმოიხილავს.
ბრიტანული დაზვერვა აქცენტს რამდენიმე შემთხვევაზე აკეთებს, მათ შორის, 2023 წლის 22 იანვარს მედიის მიერ გავრცელებულ ინფორმაციაზე, რომლის თანახმადაც ორმაგი მოქალაქეობის მქონე ყირგიზ შრომით მიგრანტებს რუსეთის სასაზღვრო პოლიციამ რუსეთის დატოვების უფლება არ მისცა, რის მიზეზადაც მათი მობილიზებულთა სიაში ყოფნა დაასახელა.
გარდა ამისა, როგორც გაერთიანებული სამეფოს დაზვერვის სპეციალისტები წერენ, 2023 წლის 23 იანვარს კრემლის პრესსპიკერმა დიმიტრი პესკოვმა განაცხადა, რომ ბრძანება „ნაწილობრივი მობილიზაციის“ შესახებ ძალაში რჩება და რომ ეს ბრძანება კვლავაც აუცილებელია შეიარაღებული ძალების საქმიანობის მხარდასაჭერად.
დაზვერვა წერს, რომ რუსეთის ხელისუფლება, დიდი ალბათობით, აგრძელებს გზების ძიებას, რათა უკრაინაში დაგეგმილი ძირითადი შეტევისთვის საჭირო პერსონალის რაოდენობა გაზარდოს, ქვეყნის შიდა უკმაყოფილების მინიმალიზებასთან ერთად.
