გაერთიანებული სამეფოს დაზვერვა 25 იანვრის ანგარიშში რუსეთის მიერ უკრაინაში Т-14 Армата ტანკების გამოყენების შესაძლებლობას მიმოიხილავს.
ამ თემაზე ბრიტანეთის დაზვერვა 19 იანვრის ანგარიშშიც წერდა. მაშინ გაერთიანებული სამეფოს დაზვერვის ექსპერტები მიუთითებდნენ სატელიტურ გამოსახულებებზე, რომლებზეც რუსეთის ტერიტორიაზე არსებულ საწვრთნელ ბაზაზე განლაგებული T-14-ები ჩანდა. თუმცა ბრიტანელი ექსპერტების მიერ ამ ტანკების გამოყენება რუსეთისთვის სარისკო ნაბიჯად იყო შეფასებული.
ბრიტანული დაზვერვის უახლესი ანგარიშის მიხედვით, უკრაინაში განთავსებული რუსი სამხედროები ბოლო თვეების განმავლობაში მათთვის გამოყოფილი T-14-ების პირველი ტრანშის მიღებისგან თავს იკავებენ, რადგან ეს ტანკები ცუდ მდგომარეობაშია.
როგორც გაერთიანებული სამეფოს დაზვერვის ანგარიშში ვკითხულობთ, არ არის ნათელი, თუ კონკრეტულად რამ გამოიწვია ეს რეაქცია, მაგრამ ბოლო სამი წლის განმავლობაში რუსი მაღალჩინოსნები საჯაროდ აღწერდნენ T-14-ების ძრავასა და თერმული გამოსახულების სისტემასთან დაკავშირებულ პრობლემებს. 2021 წელს კი, რუსეთის თავდაცვის მინისტრმა სერგეი შოიგუმ, 2022 წელს დაგეგმილი წარმოება აღწერა, როგორც მხოლოდ „ექსპერიმენტულ-ინდუსტრიული“ პარტია.
აქედან გამომდინარე, გაერთიანებული სამეფოს დაზვერვის სამსახურის შეფასებით, ნაკლებად სავარაუდოა, რომ ბრძოლაში T-14 დააკმაყოფილებს საჭირო სტანდარტებს.
