უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის თქმით, რუსეთის პრეზიდენტის, ვლადიმერ პუტინის გეგმები უკრაინასთან მიმართებაში არ შეცვლილა – მას ისევ სურს უკრაინელების, როგორც ერის განადგურება. ამის შესახებ დანილოვი ტვიტერის საკუთარ გვერდზე წერს.
დანილოვის შეფასებით, პუტინს ეს არ გამოუვა.
დანილოვმა არსებული ვითარება შეაფასა და თქვა, რომ უკრაინამ დამოუკიდებლობისთვის ბრძოლის ნახევარი გზა უკვე გაიარა. თუმცა, ჩინოვნიკის თქმით, ყველაზე რთული დღეები ქვეყანას ჯერ კიდევ წინ აქვს.
„წინ გვაქვს ყველაზე რთული პერიოდი – საბოლოოდ განვდევნოთ აგრესორი ჩვენი მიწიდან და დავსაჯოთ ის ჩადენილი დანაშაულებისთვის“, – დასძენს უკრაინის ეროვნული უსაფრთხოებისა და თავდაცვის საბჭოს მდივანი.
რუსეთში კი დღეს ისევ ისაუბრეს უკრაინასთან „სამშვიდობო მოლაპარაკებებზე“, თუმცა იქვე ხაზგასმით აღნიშნავენ, რომ უკრაინის ოკუპირებული ტერიტორიებიდან წასვლას არ აპირებენ.
„მოდით, დავიწყოთ იმით, რომ ჯერჯერობით უკრაინასთან მიმართებაში არ არსებობს სამშვიდობო გეგმა. შეუძლებელიცაა არსებობდეს რაიმე სამშვიდობო გეგმა, რომელიც არ ითვალისწინებს რუსეთის დღევანდელ ტერიტორიულ რეალობას – რუსეთის შემადგენლობაში 4 ახალი რეგიონის შესვლასთან დაკავშირებით“, – განაცხადა რუსეთის პრეზიდენტის პრესმდივანმა, დიმიტრი პესკოვმა.
პესკოვმა ხაზგასმით აღნიშნა, რომ არ იქნება მისაღები არც ერთი გეგმა, რომელიც არ გაითვალისწინებს ამ რეალობას.
