ესპანეთში უკრაინის საელჩოს ტერიტორიაზე მომხდარი აფეთქებიდან რამდენიმე დღეში უკრაინის საელჩოებმა და საკონსულოებმა ექვს ქვეყანაში სისხლიანი გზავნილები მიიღეს – ამანათებში ცხოველების თვალები ეწყო.
ამის შესახებ საკუთარ ფეისბუქგვერდზე უკრაინის საგარეო უწყების სპიკერმა, ოლეგ ნიკოლენკომ დაწერა:
„უკრაინის საელჩოები და საკონსულოები კვლავაც იღებენ მუქარის შემცველ გზავნილებს. ესპანეთში ტერაქტის შემდეგ სისხლიანი ამანათები მიიღეს უნგრეთის, ნიდერლანდების, პოლონეთის, ხორვატიის, იტალიის საელჩოებმა, გენერალურმა საკონსულოებმა ნეაპოლში, კრაკოვსა და ბრნოში. პაკეტებში, რომლებიც შეღებილი იყო სისხლისფრად და შესაბამისი სუნიც ჰქონდა, ცხოველების თვალები ეწყო“.
ნიკოლენკო დასძენს, რომ საგარეო უწყება ამ გზავნილის შინაარსის ამოცნობას ცდილობს.
უკრაინის საგარეო საქმეთა სამინისტროს ინფორმაციით, უცნობებმა დააზიანეს ვატიკანში უკრაინის ელჩის ბინის შესასვლელი, ყაზახეთის საელჩოში კი ბომბის არსებობის შესახებ შევიდა შეტყობინება, რომელიც გადამოწმების შემდეგ ცრუ აღმოჩნდა.
„გვაქვს საფუძველი ვივარაუდოთ, რომ მიმდინარეობს ტერორის კარგად დაგეგმილი კამპანია უკრაინის საელჩოებისა და საკონსულოების დასაშინებლად. ვერ მოახერხეს დიპლომატიურ ფრონტზე უკრაინის შეჩერება და ახლა დაშინებას ცდილობენ. შემიძლია თავიდანვე ვუთხრა მათ, რომ ეს მცდელობები ამაოა. ჩვენ გავაგრძელებთ ეფექტიან მუშაობას უკრაინის გამარჯვებისთვის,“ – ასე გამოეხმაურა ინციდენტებს უკრაინის საგარეო საქმეთა მინისტრი დმიტრო კულება.
საგარეო უწყების ცნობით, უკრაინის დიპლომატიური მისიები თანამშრომლობენ ადგილობრივ სამართალდამცველებთან ამ შემთხვევების გამოსაძიებლად და პასუხისმგებელი პირების გამოსავლენად.
უკრაინის საელჩოებსა და საკონსულოებში უსაფრთხოების ზომები 30 ნოემბრის შემდეგ განსაკუთრებულად გაძლიერდა.
30 ნოემბერს აფეთქება მოხდა მადრიდში უკრაინის საელჩოში. ესპანეთში უკრაინის ელჩის, სერგეი პოგორელცევის ინფორმაციით, პირადად მისთვის განკუთვნილი ამანათი აფეთქდა. დაშავდა ერთი ადამიანი. ელჩის თქმით, დიპლომატიური მისიის თანამშრომლებმა დროულად და პროფესიულად იმოქმედეს და უფრო სერიოზული ზიანი თავიდან აიცილეს.
„პაკეტში იდო ყუთი, რამაც კომენდანტს ეჭვი აღუძრა და ის ეზოში გაიტანა. როგორც კი გახსნა, რაღაცამ დაიტკაცუნა. კომენდანტმა ამანათი ხელიდან გააგდო და სწორედ მაშინ გაიგონა აფეთქების ხმა,“ – უკრაინის ელჩის თქმით, მიუხედავად იმისა, რომ ეს არ იყო მძლავრი ასაფეთქებელი და იყო მხოლოდ პატარა მოწყობილობა, შედეგები გაცილებით სხვაგვარი იქნებოდა, ის დაკეტილ სივრცეში რომ აფეთქებული.
მთავარ ფოტოზე: საეჭვო პაკეტი, რომელშიც იდო ყუთი ასაფეთქებლით/ფოტო: უკრაინის საელჩო ესპანეთში
