„ოლენა ზელენსკა: ჩვენ გავუძლებთ“ – ამ სათაურით გამოაქვეყნა 25 ნოემბერს „ბიბისიმ“ ვრცელი ინტერვიუ ოლენა ზელენსკასთან. ინტერვიუში ზელენსკა ამბობს, უკრაინელები მზად არიან ამ განსაცდელს 2-3 წელიც გაუძლონ და ამის დასტურად სოციოლოგიური კვლევის შედეგებიც მოჰყავს:
„ცოტა ხნის წინ, ფაქტობრივად, გასულ კვირას, სოციოლოგიური გამოკითხვა დასრულდა – უკრაინელებს ჰკითხეს, კიდევ რამდენის ატანა შეუძლიათ ამ პირობებში – არც სინათლე, არც სითბო.
ჩვენ ვიცით, რომ ზამთარი შეიძლება კიდევ ერთი გამოცდა გახდეს ჩვენთვის, თუ ჩვენს სახლებში სითბო არ იქნება. უკრაინელების უმრავლესობამ, ეს იყო გამოკითხულთა 90%-ზე მეტი, უპასუხა, რომ მზად არის გაუძლოს ამას ორი, სამი წელი, თუ დაინახავენ ჩვენი გაწევრიანების პერსპექტივას ევროკავშირში.
მათ უნდათ ევროპულ ოჯახში იყვნენ თანასწორნი. ჩვენ ვიცით რისთვის: გამარჯვებისთვის, საკუთარი თავის პატივისცემისთვის, იმისთვის, რომ დემოკრატიული ოჯახი გველოდება და ჩვენ გვინდა ვიყოთ ამ ოჯახში სხვებთან თანაბარი პირობებით. უკრაინელები მზად არიან გაუძლონ “.
ჟურნალისტმა მას ჰკითხა იმის შესახებაც, რამდენად ძნელია მისთვის უკრაინის პირველი ლედის როლში ყოფნა გლობალურ სცენაზე, იმის გათვალისწინებით, რომ აქამდე ზელენსკა კულისებში ყოფნას არჩევდა.
„შემიძლია ვთქვა, რომ ეს მე არ ამირჩევია, ისევე როგორც არ ამირჩევია თავიდან პირველ ლედად ყოფნა. მაგრამ ყოველთვის არ გვერგება ის როლი, რასაც ვირჩევთ. სამწუხაროდ, ასე ხდება. მე შემიძლია ვთქვა, რომ როცა გამოვდივარ პუბლიკის წინაშე, ყოველთვის გულით ვლაპარაკობ, ამიტომ იოლია ჩემთვის. მე არ ვმანიპულირებ, არ ვთამაშობ როლს. მე ვლაპარაკობ მხოლოდ იმას, რისიც მჯერა… პირველი საჯარო გამოსვლები ეს იყო სტრესი და ნერვები. ახლა ეს ბევრად უფრო იოლად ხდება,“ – უპასუხა ზელენსკამ.
მან ასევე თქვა, რომ უკრაინელები ამ ომიდან უფრო ძლიერები გამოვლენ:
„მე ვფიქრობ, რომ ყველა უკრაინელი უფრო ძლიერი გახდება ამ ომის გამო. და მე გულწრფელად მჯერა ამის, რასაც ფსიქოლოგები პოსტტრავმულ ზრდას უწოდებენ. ძალიან მინდა მჯეროდეს, რომ ის არსებობს, რომ ჩვენ შეგვიძლია გავხდეთ საუკეთესოები ყველა ამ განსაცდელის გამო – მთელი საზოგადოება“.
ჟურნალისტმა მას ასევე ჰკითხა, რას ფიქრობდა იმაზე, რომ მოლაპარაკებების დრო დადგა და ეს ომი გაჭიანურდა.
„მე მგონია, რომ ყველა უკრაინელისთვის სიტყვა მშვიდობა უდრის სიტყვა გამარჯვებას, რადგან გვესმის, რომ ჩვენი გამარჯვების გარეშე ჩვენს ქვეყანაში მშვიდობა არ იქნება. სწორედ იმიტომ, რომ ჩვენ ასეთი მტერი გვყავს, მას ასეთი განზრახვა აქვს, ომის წარმოების ასეთი მეთოდი. ეს შეიძლება იყოს ფიქტიური, „ცრუ მშვიდობა“, არასწორი და ხანმოკლე. სამწუხაროდ. ამიტომაც ჩვენ გვჭირდება გამარჯვება,“ – თქვა ოლენა ზელენსკამ.
