ნიკოლაევის ოლქის გუბერნატორის, ვიტალი კიმის ვარაუდით, რუსები პროვოკაციას აწყობენ და ხერსონზე დარტყმისთვის ემზადებიან.
საკუთარი ვარაუდის საფუძვლად ის რამდენიმე ფაქტორს ასახელებს – რუსები მასობრივად მოუწოდებენ მოსახლეობას ევაკუაციისკენ, რადგან თითქოს ხერსონზე თავდასხმას უკრაინის ძალები აპირებენ, პარალელურად კი ამზადებენ სიმააგრებს საქვემეხე არტილერიისთვის ჩაპლინკის რაიონში, საიდანაც ხერსონზე დარტყმა შეუძლიათ.
„კარგად ვიცი რუსული ტაქტიკა, ამიტომაც მაქვს შეგრძნება, რომ რუსები ხერსონზე დარტყმისთვის ემზადებიან. სამწუხაროდ,“ – ამბობს ვიტალი კიმი სოციალური ქსელით გავრცელებულ ვიდეოში.
დღესვე ხერსონში რუსების მიერ დანიშნული სამხედრო-სამოქალაქო ადმინისტრაციის უფროსმა ვიტალი სალდომ განაცხადა, რომ ხერსონის ოლქის ხელმძღვანელობამ უკრაინელთა კონტრშეტევის გამო ქალაქის დატოვება და დნეპრის მარცხენა სანაპიროზე გადასვლა გადაწყვიტა.
მისი თქმით, ევაკუცია უკვე დაიწყეს სამინისტროებმა და „საქალაქო ადმინისტრაციის“ უწყებებმა, მოქალაქეებისთვის კი ხერსონის ოლქში შესვლა ერთი კვირით აიკრძალება.
ჯერ კიდევ გუშინ ვლადიმირ სალდო იუწყებოდა, რომ ხელისუფლებამ ხერსონის მოსახლეობის „ნებაყოფლობითი გასახლების“ გადაწყვეტილება მიიღო.
მედიის ცნობით, საუკუპაციო ხელისუფლება დნეპრის მარჯვენა სანაპიროდან მდინარის მარცხენა სანაპიროზე დაახლოებით 50-60 ათასი ადამიანის გადაყვანას აპირებს. სალდოს თქმით, ის მოქალაქეები, ვინც რუსეთში გადაწყვეტს ევაკუაციას, ცხოვრების უფლების დამადასტურებელ სერტიფიკატსაც მიიღებენ.
ის, რომ რუსები ნამდვილად გეგმავენ მთელი ქალაქის იძულებით დეპორტაციას, მელიტოპოლის მერმა ივან ფედოროვმაც დაადასტურა. მისი თქმით, ეს „გენოციდის ახალი ფორმაა“
ხერსონში შექმნილ ვითარებაზე ილაპარაკა უკრაინაში რუსეთის ძალების ახალმა მთავარსარდალმა გენერალმა სერგეი სუროვიკინმაც. მის კომენტარებს კრემლისტური მედია ავრცელებს.
„ხერსონთან დაკავშირებით მომდევნო ნაბიჯები დამოკიდებულები იქნება შექმნილ სამხედრო-ტაქტიკურ სიტუაციაზე. ის მარტივი არაა, არ გამოვრიცხავ, რომ რთული გადაწყვეტილებების მიღება მოგვიწევს,“ – განაცხადა სუროვიკინმა და დასძინა, რომ მოსახლეობის ევაკუაცია უკრაინელთა მხრიდან ხერსონზე სარაკეტო შეტევის საფრთხის გამო დაიწყო. – „ჩვენ ვიმოქმედებთ ისე, რომ მაქსიმალურად გადავარჩინოთ მშვიდობიანი მოსახლეობა და ჩვენი სამხედროები.“
რუსეთის ძალების მთავარსარდალმა აღიარა ისიც, რომ ხერსონის ოლქში ვითარება დაძაბულია და უკრაინის არმია რუსულ თავდაცვის ხაზის გარღვევას ცდილობს.
