სურსათის ეროვნული სააგენტოს ინსპექტირების ჯგუფებმა ბათუმის აგრარული ბაზარი შეამოწმეს და 2,5 ტონა ხორცი დალუქეს.
სეს-ის ცნობით, ბათუმში ბაზარში მდებარე ობიექტების ნაწილში გამოვლინდა ისეთი სახის შეუსაბამობები, როგორიცაა: სანიტარიულ-ჰიგიენური ნორმების დარღვევა, ხორცის რეალიზაცია ვეტერინარული ნიშანდების გარეშე, რაც ნიშნავს, რომ პირუტყვი სასაკლაოს გვერდის ავლით არის დაკლული; ტან-ხორცის არასათანადო დანაწევრება, როცა არ იყო მოცილებული ადამიანის ჯანმრთელობისთვის საფრთხისშემცველი მაღალი რისკის პათოგენური მასალა.
სურსათის ეროვნული სააგენტოს ცნობით, დაილუქა და განადგურდა 2,5 ტონა საეჭვოდ მიჩნეული ხორცი, ბიზნესოპერატორები დაჯარიმდნენ და შეუჩერდათ საწარმოო პროცესი.
„სანიტარიული მდგომარეობის გაუმჯობესების მიზნით, ბაზარში ჩატარდა დასუფთავებისა და რეცხვა-დეზინფიცირების სამუშაოები“ – იუწყება სეს-ი.
სააგენტოს ცნობით, მიმდინარე წლის ივლის-აგვისტოში შემოწმდა 800-მდე ობიექტი, მათ შორის, სასაკლაოები და ხორცის სარეალიზაციო ობიექტები, დაილუქა 10 000 კგ-მდე ხორცი.
