აშშ-ის სახელმწიფო დეპარტამენტი შეშფოთებულია, რომ კონგრესმა შესაძლოა რუსეთი ტერორიზმის სპონსორ სახელმწიფოდ აღიაროს – წერს Politico. გამოცემის წყაროების თქმით, ვაშინგტონი შიშობს, რომ რუსეთის შეყვანა ტერორიზმის სპონსორ სახელმწიფოთა სიაში, საფრთხის ქვეშ დააყენებს უკრაინული პორტებიდან მარცვლეულის ექსპორტის შეთანხმებას და გლობალურ სასურსათო ბაზარს.
როგორც Politico აღნიშნავს, სახელმწიფო დეპარტამენტის წარმომადგენლებს ოფიციალურად რაიმე უკმაყოფილება ან მხარდაჭერა ამ პროცესისადმი არ გამოუთქვამთ, თუმცა კონგრესმენებს საკუთარი არგუმენტები მიაწოდეს.
გამოცემის ცნობით, ერთ-ერთი არგუმენტი ის სანქციებიცაა, რომლებიც „შავ სიაში“ შეყვანილი სახელმწიფოს წინააღმდეგ ამოქმედდება – გადაწყვეტილება გავლენას იქონიებს კერძო სექტორზე და იმ მნიშვნელოვან ეკონომიკურ ურთიერთობებზე, რასაც ახლანდელი სანქციების მიუხედავად, აშშ რუსეთთან ინარჩუნებს.
3 მაისს უკრაინის რადამ აშშ-ის კონგრესს მიმართა და რუსეთის ტერორიზმის სპონსორ სახელმწიფოთა სიაში შეყვანა სთხოვა. ამგვარ მოწოდებებს მუდმივად აკეთებენ უკრაინის პრეზიდენტი და უკრაინის საგარეო საქმეთა მინისტრიც.
21 ივლისს კონგრესის სპიკერმა ნენსი პელოსიმ აშშ-ის სახელმწიფო მდივანი ენტონი ბლინკენი გააფრთხილა, რომ თუკი რუსეთს ტერორიზმის მხარდამჭერ ქვეყნად სახელმწიფო დეპარტამენტი არ აღიარებს, ამას კონგრესი გააკეთებს.
27 ივლისს აშშ-ის სენატმა ერთხმად დაუჭირა მხარი რეზოლუციას, რომელიც სახელმწიფო დეპარტამენტს მოუწოდებს, რუსეთი ტერორიზმის სპონსორ სახელმწიფოდ აღიაროს.
აშშ-ის სახელმწიფო დეპარტამენტს ქვეყნისთვის ასეთი სტატუსის მინიჭება შეუძლია, თუკი მიიჩნევს, რომ ეს სახელმწიფო ტერორისტულ აქტებს უჭერს მხარს. სანქციები, რომლებიც ასეთი სახელმწიფოს წინააღმდეგ ამოქმედდება, გულისხმობს მთელ რიგ შეზღუდვებს აშშ-ის დახმარებაზე, თავდაცვითი თუ ორმაგი დანიშნულების პროდუქციის ექსპორტსა და გაყიდვაზე და სხვ.
ამჟამად ტერორიზმის სპონსორი სახელმწიფოს სტატუსი აქვს ოთხ ქვეყანას: სირიას, ირანს, კუბასა და ჩრდილოეთ კორეას.
