უკრაინის ეროვნული უსაფრთხოებისა და თავდაცვის საბჭოს მდივანმა, ოლექსი დანილოვმა, ტელემარათონის ეთერში რუსეთის შესაძლო გეგმებზე ილაპარაკა. მისი თქმით, რუსებს სურთ, „რუხ ზონად“ აქციონ არამხოლოდ ზაპოროჟიე, არამედ მთელი უკრაინა.
„მათ აქვთ პროექტი, რომელსაც ეწოდება „კუნძული რუსეთი“. მისი მიზანი ძალიან მარტივია – რუსეთი შეიძლება გარშემორტყმული იყოს ან წყლით, ან ვასალი სახელმწიფოებით. არანაირი სხვა სცენარი არ განიხილება. ერთადერთი გამონაკლისი ჩინეთია, რომელთანაც მათ მეგობრობა უნდათ,“ – ამბობს დანილოვი.
საბჭოს მდივანი დასძენს, რომ კოლონიზაციას რუსები უკვე ძალიან დიდი ხანია ეწევიან, თუმცა დარწმუნებულია, რომ ამ პროექტის განხორციელებას ვერასდროს შეძლებენ, რადგან ახლა ხდება ის, რაც მათ გეგმებში გათვალისწინებული არ ყოფილა – წინააღმდეგობა.
დანილოვის თქმით, რუსეთის არმიამ შეტევის პოტენციალი უკვე დაკარგა და ბრძოლის ველზე ვითარება რადიკალურად იცვლება.
