ნეტგაზეთი • RU

ქედასა და ხულოში ოჯახებისთვის 77 მზის სადგურს შეისყიდიან – მსურველია 196

ქედისა და ხულოს მუნიციპალიტეტების სოფლებში მცხოვრები მოქალაქეებისთვის მზის პანელებს შეისყიდიან. 77 მიკროელექტრული მზის სადგურის შესყიდვაზე ტენდერი „აგროსერვისცენტრმა“ 615 800 ლარით უკვე გამოაცხადა. მომსახურებაში შედის მონტაჟიც.

„აგროსერვისცენტრში“ განაცხადეს, რომ მზის პანელებს ევროკავშირის გრანტით შეისყიდიან. ამასთან, მოქალაქეების მხრიდან განაცხადების მიღება უკვე დასრულებულია და სულ 196 განაცხადია შესული. აქედან მაქსიმუმ 77 ბენეფიციარს შეარჩევენ. თითოეულს კი, მზის ელექტროსადგურის ღირებულების 10 პროცენტის გადახდა მოუწევს.

„ამ ეტაპზე მიმდინარეობს მონიტორინგი ბენეფიციარების შესარჩევად. ადგილზე გადამოწმდება საცხოვრებელი სახლების მდებარეობა, პრიორიტეტი იქნება, მაგალითად, ის სახლი, რომელსაც შედარებით მეტ ხანს ანათებს მზე; ასევე, ოჯახი ეწევა თუ არა რაიმე ბიზნესს, მაგალითად, საოჯახო სასტუმრო თუ სხვა. არის განსაზღვრული კრიტერიუმები, რომელთა მიხედვითაც სპეციალური კომისია შეარჩევს ჯერ პოტენციურ ბენეფიციარებს, შემდეგ მათ გაესაუბრებიან და ყველა პროცედურის ამოწურვის შემდეგ შეარჩევენ იმ ბენეფიციარებს, რომლებიც მიიღებენ მზის მიკროელექტრულ სადგურებს,“ – გვითხრეს „აგროსერვისცენტრში“.

ტენდერში წინადადების მიღება 2022 წლის 4 სექტემბერს დაიწყება და 9 სექტემბერს დასრულდება. პირობის მიხედვით, „საქონლის მიწოდება [თანმდევი მონტაჟით] უნდა განხორციელდეს ხელშეკრულების გაფორმებიდან 2022 წლის 25 ნოემბრის ჩათვლით პერიოდში“.

აგროსერვისცენტრის ინფორმაციით, „მწვანე საგრანტო პროგრამა“ ევროკავშირის (EU) და გაეროს განვითარების პროგრამის (UNDP) მხარდაჭერით ხორციელდება, „სოფლის და სოფლის მეურნეობის განვითარების ევროპის სამეზობლო პროგრამის“ (ENPARD) ფარგლებში.

გრანტის მოცულობა შეადგენს მზის ფოტოვოლტური სისტემის მთლიანი ღირებულების 90%-ს, მაგრამ არაუმეტეს 8 000 ლარს, ხოლო ბენეფიციარის თანამონაწილეობა შეადგენს, ამ სისტემის საერთო ღირებულების არანაკლებ 10%-ს.“

აღნიშნული პროგრამა ქედისა და ხულოს მუნიციპალიტეტებში ხორციელდება. ამ ეტაპზე უცნობია, ანალოგიური პროგრამა მომავალში გაგრძელდება თუ არა.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com