მთავარი,სიახლეები

გოგოების ერთადერთი საფეხბურთო გუნდი მარნეულიდან – საუკეთესოები ჩემპიონატზე

09.08.2022 • 1497
გოგოების ერთადერთი საფეხბურთო გუნდი მარნეულიდან – საუკეთესოები ჩემპიონატზე

საქართველოს ფეხბურთის ფედერაციისა და Master League-ის ინიციატივით 6 აგვისტოს 15 წლამდე გოგოების საფეხბურთო ჩემპიონატი დაიწყო „კაჭრეთის ამბასადორში“.

2022 წლის სეზონზე ტურნირში გოგოების 40-ზე მეტი გუნდი იღებს მონაწილეობას.

15 წლამდე გოგოების მარნეულის საფეხბურთო გუნდი „ალგეთი“ შეჯიბრზე წელს პირველად მოხვდა და მეორე ადგილი მოიპოვა.

15 წლამდე გოგოების საფეხბურთო გუნდი „ალგეთი” მარნეულიდან

„ალგეთი“ მარნეულში გოგოების ერთადერთი საფეხბურთო გუნდია. გუნდში 12-15 წლის ასაკობრივი კატეგორიის ოცი გოგო თამაშობს – ეთნიკურად აზერბაიჯანელები, სომხები და ქართველები.

მიუხედავად იმისა, რომ გუნდმა ჩემპიონატზე მეორე ადგილი მოიპოვა, „ალგეთის“ ერთ-ერთი მწვრთნელი, არამ აკოპიანი მიიჩნევს, რომ გუნდისთვის ეს დიდი წარმატებაა იმის გათვალისწინებით, რომ გოგოები მხოლოდ 1 წელია, რაც ვარჯიშობენ და არც სათანადო პირობები აქვთ სოფელ წერეთელში.

„ეს მარნეულის მუნიციპალიტეტის ერთადერთი ქალთა საფეხბურთო გუნდია. მეორე ადგილმა ძალიან გაგვახარა. ეს გოგოები ძალიან ცუდ პირობებში ახერხებენ ძალიან კარგად თამაშს და სრულად იტვირთებიან ვარჯიშისას.

ინფრასტრუქტურა საერთოდ არ გვაქვს სოფელ „წერეთელში“. არის მხოლოდ მოედანი. არ არის გამოსაცვლელიც კი და საშხაპეებზე საუბარიც ზედმეტია. არც საპირფარეშოა მოედანთან ახლოს.

მარნეულში სხვა დროს გოგოების საფეხბურთო გუნდი არასდროს ყოფილა და „ალგეთის“ ფეხბურთელი გოგოები სხვებს მაგალითს აძლევენ, რომ თუ ვინმეს სურს ფეხბურთის თამაში და ეს სპორტი უყვარს, ყველას შეუძლია თამაში.

ორმაგად დასაფასებელია ჩემი გუნდის მეორე ადგილი, მათ პირობების არარსებობის მიუხედავად, უყვართ სპორტი და ყველაფერს აკეთებენ, კარგი თამაში რომ აჩვენონ“, – ამბობს არამ აკოპიანი.

ერთი წლის წინ გუნდ „ალგეთის“ გოგოები უბრალოდ კარგი მეგობრები იყვნენ და  ფეხბურთის თამაში მათთვის ყოველდღიური გართობა იყო. თუმცა მერე ყველა ერთად მიხვდა, რომ ბურთი და მოედანი აღარ იყო მხოლოდ გართობა და ასე იქცა ერთი დიდი სამეგობრო საფეხბურთო გუნდად.

15 წლამდე გოგოების საფეხბურთო გუნდი „ალგეთი“ მარნეულიდან

არამ აკოპიანი იხსენებს, რომ ერთი წლის წინ, სანამ გუნდად შეიკვრებოდნენ, გოგოებს ბევრი დაბრკოლების გადალახვა მოუწიათ სტერეოტიპების გამო, რომლის მიხედვითაც „ფეხბურთი გოგოს საქმე არ არის“.

„ალგეთის“ გოგოებს ტურნირში გამარჯვების მიუხედავად ისევ შიშველ მოედანზე მოუწევთ თამაში სოფელ წერეთელში წელიწადის სხვადასხვა დროს, საშხაპეების, საპირფარეშოსა და გასახდელების გარეშე.

გადაბეჭდვის წესი


ასევე: