უკრაინის უშიშროება აცხადებს, რომ უკრაინის თავდაცვის მინისტრის ოლექსი რეზნიკოვისა და სამხედრო დაზვერვის ხელმძღვანელის, კირილო ბუდანოვის მკვლელობის მცდელობა აღკვეთა.
უშიშროების პრესსამსახურის ცნობით, მრავალეტაპიანი სპეცოპერაციის ფარგლებში გააუვნებელყვეს რუსეთის სამხედრო დაზვერვის დივერსიული ჯგუფი, რომელიც უკრაინაში შეკვეთილი მკვლელობების სერიას გეგმავდა.
„ბოროტმოქმედები ემზადებოდნენ თავდაცვის მინისტრისა და სამხედრო დაზვერვის ხელმძღვანელის ფიზიკური ლიკვიდაციისთვის. ასევე, მათ გეგმებში შედიოდა ერთ-ერთი ცნობილი უკრაინელი აქტივისტის მკვლელობაც,“ – ნათქვამია უკრაინის უშიშროების სამსახურის განცხადებაში.
უწყების ცნობით, რუსი „კურატორები“ თითოეულ მკვლელობაში 100-150 ათას დოლარს იხდიდნენ. დივერსიული ჯგუფი კი სპეციალურად ამ ოპერაციისთვის რუსეთის სამხედრო დაზვერვამ შექმნა.
ჯგუფის შემადგენლობაში შედიოდა დროებით ოკუპირებული ლუგანსკის მცხოვრები, რომელიც ამავე დროს ლუგანსკის სეპარატისტული რესპუბლიკის სამხედრო ფორმირების წევრია და აქტიურად მონაწილეობდა უკრაინის შეიარაღებული ძალების წინააღმდეგ ბრძოლებში.
უშიშროების მტკიცებით, მოსკოველი კოორდინატორის დავალებით, სწორედ დაჯგუფების ლუგანსკელი წევრი ეძებდა და არჩევდა „ქილერებს“ შეკვეთილი მკვლელობების შესასრულებლად.
მის „წინადადებას“ დათანხმდა კიევის მცხოვრები, რომელსაც დაევალა, რომ 5 ათასი ამერიკული დოლარის სანაცვლოდ უკრაინელი სამხედრო მოეკლა და ამით დაედასტურებინა, რომ შეეძლო შეესრულებინა უფრო რთული ამოცანაც, რომლის მიზანიც „უმაღლეს სამხედრო პირებზე თავდასხმა“ იყო.
უშიშროებამ ორივე მათგანი დააკავა და მათ მკვლელობის ორგანიზებისა და საომარ მდგომარეობაში სახელმწიფო ღალატის ბრალდება წაუყენა.
უკრაინის უშიშროების სპეცოპერაცია/ფოტო: უკრაინის უშიშროების სამსახური
