უკრაინელი ქალი, რომელზეც სავარაუდოდ სექსუალურად იძალადეს, ამ დროისთვისაც [21:00 საათი] ბათუმის ერთ-ერთ კლინიკაში იმყოფება და უგონო მდგომარეობაშია. ინფორმირებული პირების თქმით, ქალის მდგომარეობა მძიმეა.
ქალი სხეულზე ძალადობის ნიშნებით, ლანჩხუთის კლინიკაში წუხელ გვიან ღამით შეიყვანეს. ამის შესახებ ადგილობრივი მედია „გურია ნიუსი“ წერდა.
ბათუმის რეფერალური კლინიკის საზოგადოებასთან ურთიერთობის სამსახურს ვკითხეთ ქალის ჯანმრთელობის მდგომარეობის შესახებ. გვითხრეს, რომ კომენტარს ამ თემაზე მხოლოდ პაციენტთან თანხმობის შემთხვევაში გააკეთებენ.
„ბათუმელები“ მთელი დღის განმავლობაში ცდილობდა შს სამინისტროსთან გადაემოწმებინა ინფორმაციის ნამდვილობა. უწყებაში „ბათუმელებს“ [16:00 საათზე] უთხრეს, რომ გამოძიება შეტყობინების საფუძველზე უკვე დაწყებულია. უწყებაში ისიც კი არ დააკონკრეტეს, რა მუხლით დაიწყო გამოძიება.
„ბათუმელები“ კვლავაც ეცდება მოიპოვოს ინფორმაცია, თუ როგორია დაზარალებული ქალის ჯანმრთელობის მდგომარეობა.
