„ბათუმელების“ ინფორმაციით, დღეს, 30 ივნისს, ბათუმის პორტში რუსეთთან დაკავშირებული ნავთობის 2 ტანკერი დგას – ერთი რუსეთის დროშის ქვეშ ცურავს, მეორე კი – პირდაპირ რუსეთიდან შემოვიდა.
საზღვაო ტრანსპორტის სააგენტოში რამდენიმესაათიანი ლოდინის შემდეგაც ვერ გვიპასუხეს, ისევ ხომ არ არის ტანკერებზე სანქცირებული ნავთობპროდუქტები.
ბათუმის პორტში რუსული დროშის ქვეშ მცურავი ნავთობტანკერი NEFTERUDOVOZ 47M-ი დგას. რუსული გემი საქართველოს ტერიტორიულ წყლებში სამი დღის წინ, 27 ივნისს შემოვიდა.
ოფიციალური მონაცემების თანახმად, ნავთობტანკერი NEFTERUDOVOZ 47M-ი 30 მაისს დაიძრა რუსეთიდან, კერძოდ კი, ქერჩის სრუტიდან ეგვიპტისკენ. ეგვიპტეში, დუმიათის პორტში, ის 10 ივნისს შევიდა, იქ ერთი დღე დაყო და 11 ივნისს გეზი ბათუმის პორტისკენ აიღო.
გემები ბათუმის პორტის მისადგომებთან. მათ შორის ორი რუსეთიდან შემოსული ნავთობტანკერია. ბათუმი. 30. 06. 2022
კიდევ ერთი გემი, რომელიც ამჟამად ბათუმის საზღვაო აკვატორიაში იმყოფება, არის მალტის დროშის ქვეშ მცურავი ნავთობტანკერი Minerva Gloria. ოფიციალური მონაცემების თანახმად, Minerva Gloria ნოვოროსიისკის პორტიდან გამოვიდა.
ნედლი ნავთობით დატვირთული ტანკერი ბათუმის პორტთან ახლოს, მახინჯაურში ღუზაზე დგას.
ოფიციალური ინფორმაციით, Minerva Gloria ნოვოროსიისკის პორტიდან გამოვიდა
„ბათუმელები“ დაუკავშირდა საზღვაო ტრანსპორტის სააგენტოს. დავინტერესდით, საქართველოს ტერიტორიულ წყლებში შემოსულ რუსულ გემებზე ხომ არ არის სანქცირებული ნავთობპროდუქტები.
იმავე კითხვით მივმართეთ საქართველოს ეკონომიკის სამინისტროსაც.
ინფორმაციას მიღებისთანავე განვაახლებთ.
ცნობისათვის, 27 ივნისს ბათუმის პორტიდან გააბრუნეს სანქცირებული „როსნეფტის“ ნავთობპროდუქტებით დატვირთული თურქული დროშის ქვეშ მცურავი ტანკერი– ESEN KA.
განახლება: დღის ბოლოს საზღვაო ტრანსპორტის სააგენტომ ოფიციალური განცხადება გაავრცელა, სადაც ნათქვამია, რომ ბათუმში შემოსულ ნავთობტანკერებს ტვირთი არ შემოუტანიათ.
___
ამავე თემაზე:
ბათუმის პორტში 2 დღეა რუსული სანქცირებული ნავთობპროდუქტებით დატვირთული გემი დგას
