ნეტგაზეთი • RU

ლონდონი პირველი დაიბომბება, თუ მესამე მსოფლიო ომი დაიწყება – პუტინთან დაახლოებული პოლიტიკოსი

რუსეთის პრეზიდენტთან, ვლადიმერ პუტინთან დაახლოებული პოლიტიკოსი, დუმის დეპუტატი ანდრეი გურულევი აცხადებს, რომ ლონდონი იქნება პირველი ქალაქი, რომელიც ახალი მსოფლიო ომის შემთხვევაში დაიბომბება.

Sky News-ის ცნობით, გურულევმა ეს განცხადება რუსეთის პირველ არხთან გააკეთა. მისი თქმით,  თუ კალინინგრადის ბლოკადა ომს გამოიწვევს, პირველი სწორედ ლონდონი დაზარალდება.

Sky News გურულევის რამდენიმე ციტატას აქვეყნებს:

„ჩვენ გავანადგურებთ მტრის კოსმოსური სატელიტების მთელ ჯგუფს პირველივე საჰაერო ოპერაციის დროს“.

„არავის აინტერესებს, ამერიკელები იქნებიან თუ ბრიტანელები, ჩვენ მათ შევხედავთ, როგორც NATO-ს“.

„მეორე, ჩვენ დავასუსტებთ მთელ ანტისარაკეტო სისტემას, ყველგან და 100%-ით“.

„მესამე, ჩვენ ნამდვილად არ დავიწყებთ, ვარშავით, პარიზით ან ბერლინით. პირველი დარტყმა ლონდონზე იქნება“.

„ცხადზე უცხადესია, რომ მსოფლიოს საფრთხე სწორედ ანგლო-საქსებისგან ემუქრება“.

გუშინ, ბრიტანეთის პრემიერ-მინისტრმა, ბორის ჯონსონმა განაცხადა, რომ G7-ის ქვეყნებმა და NATO-ს მოკავშირეებმა არ უნდა მოსთხოვონ უკრაინას, დათანხმდეს არამომგებიან პირობებს მშვიდობის სანაცვლოდ, მაშინ, როდესაც რუსეთის სასტიკი სამხედრო აგრესია გრძელდება.

ბრიტანეთის ხელისუფლება აქტიურად უჭერს მხარს უკრაინას რუსულ აგრესიასთან ბრძოლაში. გაერთიანებული სამეფოს დახმარება მოიცავს შეიარაღებასაც. თვითონ ჯონსონი 24 თებერვლის შემდეგ ორჯერ იმყოფებოდა კიევში.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.