ნეტგაზეთი • RU

გერმანია 178 მლნ ევროს ღირებულების საჰაერო თავდაცვის სისტემას გადასცემს უკრაინას

გერმანიაში უკრაინის ელჩი, ანდრეი მელნიკი აცხადებს, რომ გერმანია უკრაინას გადასცემს თანამედროვე საჰაერო თავდაცვის სისტემებს, რომლებიც მსოფლიოში საუკეთესოდ ითვლება.

ელჩის თქმით, ასეთი სისტემები შეძლებს რამდენიმე წლის განმავლობაში, უკრაინის თავზე უზრუნველყოს უსაფრთხო ცა.

მელნიკის განცხადებით, გერმანია მზადაა გადასცეს უკრაინას საჰაერო თავდაცვის სისტემა, რომელიც თავად ბუნდესვერსაც [გერმანიის ფედერაციული რესპუბლიკის შეიარაღებული ძალები] კი არ აქვს.

„ვიმედოვნებ, ბერლინის მხარდაჭერით შევიძენთ მომდევნო 10 სტაციონარულ საჰაერო თავდაცვის სისტემას – IRIS-T, რომელიც მსოფლიოში ერთ-ერთ ყველაზე მძლავრ სისტემად ითვლება. ის მომდევნო წლების განმავლობაში უზრუნველყოფს უსაფრთხო ცას უკრაინის თავზე“, – განაცხადა ანდრეი მელნიკმა „უკრინფორმთან“ ინტერვიუში.

უკრაინაში გერმანიის ელჩის თქმით, უკრაინელმა და გერმანელმა დიპლომატებმა კულისებში მჭიდრო თანამშრომლობის შედეგად, მოახერხეს პოლიტიკური წინააღმდეგობის დაძლევა და თავდაცვის მწარმოებელ Diehl Defense-თან უკვე გააფორმეს სისტემის შესყიდვაზე 178 მილიონი ევროს ღირებულების პირველი კონტრაქტი.

მელნიკის ინფორმაციით, საჰაერო თავდაცვის სისტემების შეძენას გერმანიის მთავრობა დააფინანსებს.

___

ფოტო: IRIS-T, რომელსაც გერმანია უკრაინისთვის იყიდის

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.