მთავარი,სიახლეები

ჩავუშოღლუ და ლავროვი შავ ზღვაში მარცვლეულის უსაფრთხოდ გადატანას განიხილავენ

08.06.2022 • 1035
ჩავუშოღლუ და ლავროვი შავ ზღვაში მარცვლეულის უსაფრთხოდ გადატანას განიხილავენ

დღეს, 8 ივნისს, ანკარაში ერთმანეთს ხვდებიან თურქეთისა და რუსეთის საგარეო საქმეთა მინისტრები, მევლუთ ჩავუშოღლუ და სერგეი ლავროვი.

თურქული მედიის ცნობით, მოლაპარაკების თემაა მშრალი ტვირთის, მარცვლეულისთვის უსაფრთხო დერეფნის უზრუნველყოფა შავ ზღვაში.

„საგარეო საქმეთა უწყებების ხელმძღვანელები განიხილავენ ანკარასა და მოსკოვს შორის ორმხრივ ურთიერთობებს და პერსპექტივებს და რეგიონულ საკითხებს, მათ შორის, უკრაინის ომს.

ორი ქვეყნის დელეგაციაში ასევე შედიან თავდაცვის სფეროს წარმომადგენლები“ – წერს თურქული ახალი ამბების სააგენტო „ანადოლუ“.

გუშინ, 7 ივნისს, თურქეთის თავდაცვის მინისტრმა ჰულუსი აკარმა განაცხადა, რომ თურქეთი აქტიურ ძალისხმევას გასწევს უკრაინის შავი ზღვის პორტებში ომის შედეგად დაგროვილი მარცვლეულის ექსპორტისთვის დერეფნის შესაქმნელად.

„ჩვენ ვცდილობთ ამ საკითხზე რაც შეიძლება მალე მივაღწიოთ შედეგს. გარკვეული პროგრესი მიღწეულია. თუმცა არის ტექნიკური საკითხები, რომლებსაც განხილვა სჭირდება. კერძოდ: როგორ იმუშავებს დერეფანი? როგორ და ვინ გაწმენდს პორტებს ნაღმებისგან, რომელი გემები გაჰყვებიან მშრალი ტვირთის გემებს“, – განაცხადა აკარმა.

_________________

ფოტოზე: ლავროვი და ჩავუშოღლუ. ფოტო: სააგენტო „ანადოლუ“

გადაბეჭდვის წესი


ასევე: