მთავარი,სიახლეები

სტამბოლში რუსეთ-უკრაინის დელეგაციების შეხვედრა დაიწყო

29.03.2022 • 1532
სტამბოლში რუსეთ-უკრაინის დელეგაციების შეხვედრა დაიწყო

უკრაინისა და რუსეთის დელეგაციების შეხვედრა სტამბოლში, დოლმაბაჰჩეს სასახლეში, უკვე დაიწყო. დელეგაციის წევრებს მიმართა თურქეთის პრეზიდენტმა, რეჯებ თაიფ ერდოღანმა.

„ომის გაგრძელება არავის მოუტანს სარგებელს,“ – ერდოღანის ეს ციტატა დაწერა ტვიტერზე უკრაინის პრეზიდენტის მრჩეველმა მიხაილო პოდოლიაკმა. – „თქვენ, როგორც დელეგაციებს, გაკისრიათ ისტორიული პასუხისმგებლობა დღეს მიღებულ გადაწყვეტილებებზე“.

ერდოღანმა თავის მიმართვაში ასევე თქვა: „მოლაპარაკებებმა მთელ მსოფლიოს გაუჩინა იმედი. კონფლიქტის გაგრძელება არავისთვის არ არის სასარგებლო. ომს არ ჰყავს გამარჯვებულები. დადგა დრო, რომ მოლაპარაკებებმა შედეგი გამოიღოს. თურქეთს ეს გულწრფელად სურს და მზად ვართ, დაგეხმაროთ“.

Financial Times-ის ინფორმაციით, ცეცხლის შეწყვეტის თაობაზე მოლაპარაკებებში რუსეთი აღარ ითხოვს უკრაინის „დენაციფიკაციას“ და განიარაღებას, რაც ომის დაწყებისას რუსეთის პრეზიდენტ ვლადიმერ პუტინის ორი განცხადებული მიზანი იყო.

გამოცემა 4 წყაროზე დაყრდნობით წერს, რომ რუსი და უკრაინელი მომლაპარაკებლები განიხილავენ პოტენციურ შეთანხმებას, რომელიც ითვალისწინებს უკრაინის სამხედრო ნეიტრალიტეტს – ნატო-ში გაწევრიანების ან უცხოური ბაზების მასპინძლობის აკრძალვას, მაგრამ საშუალებას აძლევს უკრაინას, მოიძიოს უსაფრთხოების გარანტიები სხვა ქვეყნებისგან და გაწევრიანდეს ევროკავშირში.

უკრაინული მხარის მომლაპარაკებელმა დავით არახამიამ Financial Times-ს განუცხადა, რომ უსაფრთხოების გარანტიები შეიძლება გულისხმობდეს ისეთი ქვეყნებისგან, როგორიცაა, მაგალითად, შეერთებული შტატები, დაეხმარონ უკრაინას თავდასხმის შემთხვევაში. კოლექტიური თავდაცვის ასეთი წესი მან ნატო-ს ხელშეკრულების მე-5 მუხლს შეადარა.

თურქეთში დოლმაბაჰჩეს სასახლიდან გავრცელებულ ფოტოებში ჩანს, რომ აქ იმყოფება რუსი ოლიგარქი, რომან აბრამოვიჩი. ის მოლაპარაკების დაწყებამდე თურქეთის პრეზიდენტს შეხვდა.

უკრაინაში ომის პარალელურად მოლაპარაკებები მიმდინარეობს უკრაინასა და რუსეთს შორის სამშვიდობო შეთანხმებაზე. ორი ქვეყნის დელეგაციებს შორის მოლაპარაკებების სამი რაუნდი გაიმართა ბელარუსში, ასევე, ყოველდღიურ რეჟიმში გრძელდება ონლაინდისკუსიები.

უკრაინისა და რუსეთის საგარეო საქმეთა მინისტრები კი ერთმანეთს შეხვდნენ თურქეთში, თუმცა სამშვიდობო შეთანხმებას ვერ მიაღწიეს.

გადაბეჭდვის წესი


ასევე: