სურსათისა და სოფლის მეურნეობის ორგანიზაციის (FAO) მონაცემებით, თებერვალში სურსათზე მსოფლიოში ფასები კვლავ გაიზარდა და ყველა დროის მაქსიმუმს მიაღწია. ყველაზე მნიშვნელოვნად მცენარეული ზეთებისა და რძის პროდუქტების ფასებია გაზრდილი.
FAO-ს თანახმად, ყველაზე მეტად გაიზარდა მცენარეული ზეთის ფასის ინდექსი, ის წინა თვესთან შედარებით 8,5 პროცენტით არის მომატებული, რაც ახალი ისტორიული მაქსიმუმია. FAO-ს ცნობით, ეს ძირითადად განპირობებულია პალმის, სოიას და მზესუმზირის ზეთებზე გაზრდილი ფასით.
FAO-ს ცნობით ზეთის ფასის ინდექსის მაჩვენებლის ასეთი მკვეთრი ზრდა დიდწილად განპირობებულია იმპორტის გლობალური მოთხოვნით შემცირებული მიწოდების ფონზე, კერძოდ, ისეთი ფაქტორების გამო, როგორიცაა პალმის ზეთის მიწოდების შემცირება ინდონეზიიდან [მსოფლიოს მთავარი ექსპორტიორი], სოიას მოსავლის პერსპექტივის გაუარესება სამხრეთ ამერიკაში და შეშფოთებები მზესუმზირის ზეთის ექსპორტის შესაძლო შემცირების შესახებ, შავი ზღვის რეგიონში არსებული შეფერხებების გამო.
რაც შეეხება რძის პროდუქტების ფასების ინდექსს, FAO-ს თანახმად ეს მაჩვენებელი თებერვალში საშუალოდ 6,4 პროცენტით მაღალი იყო, ვიდრე იანვარში, რაც განპირობებულია მოსალოდნელზე ნაკლები რძის მარაგით, ასევე, იმპორტის მუდმივი მოთხოვნით, განსაკუთრებით ჩრდილოეთ აზიიდან და ახლო აღმოსავლეთიდან.
FAO-ს მარცვლეულის ფასების ინდექსი წინა თვესთან შედარებით გაიზარდა 3.0 პროცენტით, რაც გამოწვეულია მსხვილ მარცვლეულზე ფასის მაღალი კვოტირებით, კერძოდ, ხორბლის მსოფლიო ფასები გაიზარდა 5,1 პროცენტით, რაც დაკავშირებულია სამხრეთ ამერიკაში ნათესების არახელსაყრელ პირობებთან, უკრაინიდან სიმინდის ექსპორტთან დაკავშირებულ გაურკვევლობებსა და ხორბლის საექსპორტო ფასების ზრდასთან.
FAO-ს მონაცემებით, 2022 წლის თებერვალში ხორბლის მსოფლიო ფასი 2,1 პროცენტით გაიზარდა, რისი მთავარი მიზეზიც ძირითადად შავი ზღვის პორტებიდან საერთაშორისო ბაზრებზე მარაგების მოწოდებასთან დაკავშირებული გაურკვევლობაა.
საანგარიშო პერიოდში FAO-ს შაქრის ფასის ინდექსი, ინდოეთსა და ტაილანდში წარმოების ზრდის გამო, 1,9 პროცენტით დაეცა, ხორცის ფასის ინდექსი კი 1,1 პროცენტით გაიზარდა.
