რძის პროდუქტების მწარმოებელი ფინური კომპანია Valio და ყავის მწარმოებელი Paulig-ი რუსეთში მუშაობას წყვეტენ.
ამის შესახებ კოპმანიებმა დღეს, 7 მარტს, განაცხადეს.
„ჩვენ მკაცრად ვგმობთ რუსეთის თავდასხმას უკრაინაზე. Valio-ს არ აქვს ეთიკური წინაპირობები რუსეთის ფედერაციაში მოქმედების გასაგრძელებლად და, შესაბამისად, ჩვენ ვწყვეტთ მუშაობას რუსეთში”, – თქვა Valio-ს აღმასრულებელმა დირექტორმა ანიკა ჰურმემ.
„ვალიოს“ აქვს ქარხანა რუსეთში. კომპანიის თანამშრომლების რაოდენობა რუსეთში დაახლოებით 400 ადამიანია.
მსგავსი გადაწყვეტილება მიიღო ყავის მწარმოებელმა კომპანია – Paulig-მაც.
„პაულიგი ტოვებს რუსეთს“, – აცხადებს კომპანია.
Paulig-ს აქვს ქარხანა რუსეთში, ტვერის რეგიონში. რუსულ სააგენტო „ტასის“ ცნობით, აქ დაახლოებით 200-მდე ადამიანია დასაქმებული.
ორივე კომპანია აცხადებს, რომ რუსეთის ბაზრიდან გასვლის პროცესს დაუყოვნებლივ დაიწყებენ.
მას შემდეგ, რაც 24 თებერვალს რუსეთის შეიარაღებული ძალები თავს დაესხნენ უკრაინას და საპასუხოდ ევროკავშირმა რუსეთს მკაცრი სანქციები დაუწესა, რუსეთში მუშაობა შეაჩერა ასზე მეტმა ცნობილმა კომპანიამ.
______________
ფოტოზე: „ვალიოს“ ქარხანა რუსეთში. ფოტო: ევროპის პრესფოტო სააგენტო. EPA/SERGEI ILNITSKY
