ომის დროს უკრაინის მიერ გამოშვებულ პირველ საფოსტო მარკას ექნება წარწერა: Русский корабль, иди на#уй – ამის შესახებ ინფორმაციას უკრაინის ფოსტა, ukrposhta ავრცელებს.
„უკრაინული მარკა, რომელიც სახელმწიფოს ისეთივე სიმბოლოა, როგორც დროშა, გერბი ან ჰიმნი, დღეს 30 წლის იუბილეს აღნიშნავს. მაგრამ რუსეთთან ომის გამო გადავწყვიტეთ აღნიშვნის ნაცვლად, გამოვაცხადოთ სახალხო კონკურსი საფოსტო მარკის საუკეთესო ესკიზზე სათაურით – Русский военный корабль, иди на#уй!”.
მარკა აუცილებლად იქნება საერთაშორისო, რათა ყველამ შეძლოს მისი გაგზავნა ნებისმიერ ქვეყანაში” – წერს უკრაინის ფოსტა განცხადებაში.
ესკიზების გაგზავნის ბოლო დღე 4 მარტია.
„კონკურსზე წარმოდგენილი ყველა ნამუშევარი გამოქვეყნდება აქ, „უკრპოშტას“ ფეისბუქის გვერდზე, რათა ხალხმა მისცეს ხმა. საკონკურსო ნამუშევარი, რომელიც ყველაზე მეტ ხმას მიიღებს, მასობრივი ტირაჟით დაიბეჭდება“ – წერს ukrposhta.
ომის მიუხედავად, უკრაინის ფოსტის თანამშრომლები აგრძელებენ მუშაობას. ფუნქციონირებს ფილიალები დიდ ქალაქებსა და რაიონულ ცენტრებში, გარდა რეგიონებისა, სადაც საომარი მოქმედებები მიმდინარეობს. სოფლებში მუშაობა შეზღუდულია, რადგან უკრაინის ფოსტის განმარტებით, 5 მარტიდან პენსიებისა და სუბსიდიების დასარიგებლად რესურსებსა და საწვავს ზოგავენ.
