გერმანიის ქალაქ მიუნხენის მერმა, დიტერ რაიტერმა, მიუნხენის ფილარმონიული ორკესტრის მთავარი დირიჟორი, რუსი მუსიკოსი ვალერი გერგიევი, თანამდებობიდან გაათავისუფლა, რადგან მუსიკოსი არ გაემიჯნა რუსეთის მიერ უკრაინაში დაწყებულ ომს.
ქალაქის მერიის განცხადებით, გერგიევმა, რომელიც 2015 წლიდან მთავარი დირიჟორის პოსტს იკავებდა, არ უპასუხა მოთხოვნას, დაეგმო პუტინის მიერ დაწყებული ომი უკრაინაში.
„თუკი ვალერი გერგიევი ცხადად არ დააფიქსირებს პოზიციას ორშაბათამდე, აღარ შეეძლება იყოს ჩვენი სიმფონიური ორკესტრის მთავარი დირიჟორი“, – განაცხადა ქალაქის მერმა რამდენიმე დღის წინ.
რამდენიმე დღის წინ გავრცელდა მილანის მერის, ჯუზეპე სალამის განცხადებაც, რომელმაც ასევე მოუწოდა გერგიევს, დაეგმო თავდასხმა უკრაინაზე, თუკი „ლა სკალას“ თეატრთან თანამშრომლობის გაგრძელება სურდა.
__________________
ფოტო: ევროპის პრესფოტო სააგენტო. EPA/ROBERT GHEMENT
