გაერთიანებული სამეფოს პრემიერ-მინისტრი ბორის ჯონსონი „ნატოს“ ლიდერებს რუსეთის SWIFT-დან გათიშვისკენ მოუწოდებს. ამის შესახებ ჯონსონი ფეისბუქზე წერს.
„ამ შუადღისას NATO-ს ლიდერებს მოვუწოდე რუსეთის SWIFT-დან გასათიშად გადადგან სასწრაფო ნაბიჯები, რათა პრეზიდენტ პუტინსა და მის რეჟიმს მაქსიმალური ტკივილი მივაყენოთ.
უკვე გამოცხადებული სანქციების პაკეტის გარდა, დიდი ბრიტანეთი პუტინისა და საგარეო საქმეთა მინისტრის სერგეი ლავროვის წინააღმდეგ სანქციებს დაუყოვნებლად დააწესებს“ – აცხადებს ბორის ჯონსონი.
მას შემდეგ, რაც რუსეთი უკრაინაში შეიჭრა, აშშ და მოკავშირეები რუსეთისთვის ფინანსური სანქციების დაკისრებას განიხილავენ, რომელთა შორის SWIFT-ის სისტემიდან მისი ამოგდებაცაა.
როგორც NBC-ს ფინანსური ანალიტიკოსები აცხადებენ, ეს დაახლოებით ისეთი მასშტაბის ფინანსური სანქციაა, როგორც შეიარაღებული კონფლიქტისას ბირთვული იარაღის გამოყენება და უპრეცედენტო ნაბიჯად ფასდება მსოფლიოში ერთ-ერთი უდიდესი ეკონომიკის წინააღმდეგ.
