მთავარი,სიახლეები

თურქეთს არ შეუძლია რუსულ გემებს უარი უთხრას შავი ზღვის სრუტეებში შესვლაზე – თურქეთის საგარეო

25.02.2022 • 3933
თურქეთს არ შეუძლია რუსულ გემებს უარი უთხრას შავი ზღვის სრუტეებში შესვლაზე – თურქეთის საგარეო

„თურქეთს არ შეუძლია რუსული სამხედრო ხომალდების წვდომის შეჩერება შავ ზღვაზე  თავისი სრუტეების მეშვეობით ისე, როგორც ამას უკრაინა ითხოვს, რადგან ხომალდებს საკუთარ ბაზაზე დაბრუნების უფლებას საერთაშორისო ხელშეკრულება აძლევს“, – განაცხადა თურქმა საგარეო საქმეთა მინისტრმა, მევლუთ ჩავუშოღლუმ დღეს, 25 თებერვალს. ამის შესახებ „როიტერსი“ წერს.

მას შემდეგ, რაც ხუთშაბათს, 24 თებერვალს, მოსკოვმა უკრაინის წინააღმდეგ სრულმასშტაბიანი თავდასხმა დაიწყო ხმელეთიდან, ჰაერიდან და ზღვიდან, უკრაინამ თურქეთს მიმართა, დაბლოკოს რუსული სამხედრო ხომალდების გავლა დარდანელისა და ბოსფორის სრუტეებში, რომლებიც შავ ზღვაში გადის. 

„1936 წლის მონტროს კონვენციით, თურქეთს აქვს კონტროლი სრუტეებზე და შეუძლია შეუზღუდოს სამხედრო ხომალდების ტვირთის გატარება ომიანობის ან საფრთხის წინაშე ყოფნის დროს. მაგრამ უკრაინის თხოვნა თურქეთს, NATO-ს წევრს, რთულ მდგომარეობაში აყენებს იმდენად, რამდენადაც იგი ცდილობს საკუთარი დასავლური ვალდებულებებისა და რუსეთთან ახლო კავშირების დარეგულირებას,“ – წერს „როიტერსი“. 

ყაზახეთში სიტყვით გამოსვლისას თურქეთის საგარეო საქმეთა მინისტრმა თქვა, რომ თურქეთი სწავლობდა კიევის მოთხოვნას, მაგრამ რუსეთს კონვენციით ჰქონდა უფლება, თავისი გემები დაებრუნებინა საკუთარ ბაზაზე, ამ შემთხვევაში, შავ ზღვაში. 

შესაბამისად, თურქეთმა ყველა სამართლებრივი პროცედურის გავლის შემდეგ უკრაინის თხოვნა რომც დააკმაყოფილოს და დაკეტოს სრუტეები რუსული ხომალდებისთვის, მისი თქმით, ეს შეაჩერებდა მხოლოდ შავ ზღვაში უკვე მყოფი რუსული გემების გადაადგილებას ხმელთაშუა ზღვის მიმართულებით. 

„თუ კი ომში ჩართული მხარე მოითხოვს მისი ხომალდების საკუთარ ბაზაზე დაბრუნებას, ეს მოთხოვნა უნდა დაკმაყოფილდეს“, –  ამბობს ჩავუშოღლუ. 

ჩავუშოღლუმ ასევე დასძინა, რომ სამართლის თურქი ექსპერტები ჯერ კიდევ განიხილავენ, უკრაინის კონფლიქტი შეიძლება თუ არა განისაზღვროს როგორც ომი. იმ შემთხვევაში, თუ კი თურქეთი მიიჩნევს, რომ ეს ომია, ეს შესაძლებელს გახდის მონტროს კონვენციის უფლების – სრუტეების ჩაკეტვის გააქტიურებას. 

უკრაინის ელჩმა თურქეთში, ვასილ ბოდნარმა, დღეს, 25 თებერვალს, განაცხადა, რომ კიევს  რუსული გემებისთვის სრუტეების ჩაკეტვის მოთხოვნაზე ანკარისგან დადებითი პასუხის მოლოდინი აქვს.

ასევე, ჩავუშოღლუმ კიდევ ერთხელ დაადასტურა, რომ ანკარა არ ეთანხმება რუსეთის წინააღმდეგ ეკონომიკურ სანქციებს. 

„თურქეთმა შეძლო კარგი კავშირების დამყარება ორივესთან – რუსეთთანაც და უკრაინასთანაც. მან თქვა, რომ რუსული თავდასხმა მიუღებელია და მხარს უჭერს უკრაინის ტერიტორიულ მთლიანობას, თუმცა თავი აარიდა მომხდარის აღსაწერად სიტყვა „შეჭრის” გამოყენებას“ – წერს „როიტერსი“. 

ანკარა წარმატებით თანამშრომლობს მოსკოვთან თავდაცვისა და ენერგეტიკის საკითხებში, მაგრამ ამავდროულად, მან უკრაინას სამხედრო დრონები მიჰყიდა და მეტიც, ერთობლივ წარმოებაზე გააფორმა ხელშეკრულება. 

_____________________________________

მომზადებულია „როიტერსზე“ დაყრდნობით.

გადაბეჭდვის წესი


ასევე: