კუნძულ ზმეინს რუსული სამხედრო გემებიდან ცეცხლი გაუხსნეს – უკრაინის შსს

უკრაინის შინაგან საქმეთა სამინისტროს ინფორმაციით, რუსული გემებიდან თავს დაესხნენ ზმეინის კუნძულს [საქართველოს დროით 18:11 საათი].

„ოკუპანტებმა ცეცხლი გახსნეს სამხედრო გემებიდან. მესაზღვრეები და უკრაინის შეიარაღებული ძალები თავდაცვას ახერხებენ“, – წერია უწყების მიერ გავრცელებულ განცხადებაში.

ოფიციალური ინფორმაციით, კუნძულის ნაპირებთან ამჟამად იმყოფება რუსეთის შავი ზღვის ფლოტის ორი გემი – „მოსკოვი“ და „ვასილი ბიკოვი“.

_____

დღეს, 24 თებერვლის დილით რუსეთმა  უკრაინაში სრულმასშტაბიანი ომი წამოიწყო.

რუსეთის პრეზიდენტმა პუტინმა დონბასისა და ლუგანსკის სეპარატისტული რეგიონების დაცვის საბაბით უკრაინაში „სამხედრო ოპერაციის“ დაწყების შესახებ განაცხადა.

პუტინმა იარაღის დაყრისკენ მოუწოდა უკრაინელ ჯარისკაცებს.

პუტინის განცხადებიდან მალევე დაიწყო სტრატეგიული ობიექტების დაბომბვა უკრაინის ქალაქების შემოგარენში, მათ შორის, კიევში.

თბილისის დროით 14:30 დადასტურდა 40-მდე უკრაინელი სამხედროსა და 10-მდე სამოქალაქო პირის დაღუპვა. განადგურდა რამდენიმე ერთეული სამხედრო ტექნიკა.