Batumelebi | 29 362 აბიტურიენტი სტუდენტი გახდა, მათგან გრანტი 6 500-მა მოიპოვა 29 362 აბიტურიენტი სტუდენტი გახდა, მათგან გრანტი 6 500-მა მოიპოვა – Batumelebi
ნეტგაზეთი • RU

29 362 აბიტურიენტი სტუდენტი გახდა, მათგან გრანტი 6 500-მა მოიპოვა

გამოცდების ეროვნული ცენტრის ინფორმაციით, 2021 წელს უმაღლეს საგანმანათლებლო დაწესებულებებში სწავლის გაგრძელების უფლება 29 362 – მა აბიტურიენტმა მოიპოვა.

„რაც იმას ნიშნავს, რომ უმაღლეს სასწავლებლებში გამოცდებზე რეგისტრირებული აბიტურიენტების 76%-ზე მეტი გახდა სტუდენტი.

სახელმწიფო გრანტი გადანაწილდა 6 500-ზე მეტ  სტუდენტზე,  სახელმწიფოს მიერ სრულად დაფინანსებულ საგანმანათლებლო პროგრამებზე კი სწავლას 4200-ზე მეტი აბიტურიენტი განაგრძობს“, – აცხადებს გამოცდების ცენტრი.

ცენტრის ინფორმაციით, ქართულ ენაში მომზადების პროგრამაზე ჩაირიცხა 1330-ზე მეტი გამოსაცდელი. „წელს ერთიან ეროვნულ გამოცდებში მონაწილეობის სურვილი 38 400-ზე მეტმა აბიტურიენტმა გამოთქვა.

საბოლოო შედეგების გაგებას აბიტურიენტები მოკლე ტექსტური შეტყობინებითაც შეძლებენ – გამოსაცდელმა მობილური ტელეფონიდან (მაგთი, ჯეოსელი) საკუთარი საგამოცდო საიდენტიფიკაციო ცხრანიშნა ნომერი უნდა გააგზავნოს ნომერზე 93333“.

პირველადი შედეგების გამოქვეყნების შემდეგ აბიტურიენტებს შესაძლებლობა ჰქონდათ გაესაჩივრებინათ მიღებული ქულა ან კონკრეტული დავალების შეფასება. ამ შესაძლებლობით აპლიკანტთა დაახლოებით 3%-მა ისარგებლა – სულ შევიდა 3355 სააპელაციო განაცხადი, მათგან შეფასება შეიცვალა 1 435 შემთხვევაში.

__________________________

მთავარი ფოტო: „ბათუმელების“ არქივი/ეროვნული გამოცდები.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com