ბათუმის ფიზიკა-მათემატიკის გაძლიერებული სწავლების [„კომაროვის“] სკოლაში მოსახვედრად გამოცდაზე 145 მოსწავლე დარეგისტრირდა. სკოლაში მოსწავლეები მათემატიკაში გამოცდის წარმატებით ჩაბარების საფუძველზე ჩაირიცხებიან.
მათემატიკის გამოცდა 2021 წლის 25 აგვისტოს ჩატარდება.
სკოლა 200 მოსწავლეზეა გათვლილი, თუმცა წელს მხოლოდ სამი კლასი იქნება და 75 მოსწავლეს მიიღებენ – 50 მოსწავლეს მე-7 კლასში [25-25 თითო კლასში] და 25 მოსწავლეს მე-8 კლასში.
გამოცდის ჩასაბარებლად დარეგისტრირებული 145 მოსწავლიდან, ძირითადად არიან მოსწავლეები ბათუმიდან, ასევე ქობულეთიდან, თბილისიდან, ფოთიდან და გურიის რეგიონიდან.
ახალ სკოლას, რომელიც გოროდოკის დასახლებაში [სვიშჩევსკის ქ.N1-ში] მდებარეობს, აქვს საერთო საცხოვრებელიც, თუმცა წელს ის არ იფუნქციონირებს.
ბათუმში „კომაროვის სკოლის“ მშენებლობა 2020 წლის დეკემბერში დასრულდა.
ახალი სკოლა, როგორც მე-3 კორპუსი, ქალაქ ბათუმის N6 ფიზიკა-მათემატიკის საჯარო სკოლის დაქვემდებარებაში იქნება.
რაც შეეხება პედაგოგებს, მათ, მათემატიკის გამოცდის დასრულებისა და მოსწავლეების ჩარიცხვის შემდეგ, კონკურსის წესით შეარჩევენ.
https://batumelebi.netgazeti.ge/news/357447/
