„სწორედ ამ დღეებში ხდება საქართველოს გაფორმება ავტორიტარულ რეჟიმად,“ – მიიჩნევს ზაალ ანდრონიკაშვილი, პუბლიცისტი, ლაიბნიცის ლიტერატურისა და კულტურის ცენტრის მეცნიერ-თანამშრომელი და ილიას უნივერსიტეტის პროფესორი. მას ვკითხეთ, თუ რა დაინახა პრემიერ ირაკლი ღარიბაშვილის გზავნილებში.
გარდა იმისა, რომ დღეს, 12 ივლისს, პრემიერმა შეთქმულების თეორია დააბრალა „თბილისი პრაიდის“ მონაწილეებს და პროვოკაციის მოწყობაში დაადანაშაულა ადამიანები, რომელთა უფლებების დაცვაც სახელმწიფომ ვერ შეძლო და პირიქით, ძალადობას შეუწყო ხელი, ღარიბაშვილმა დღეს პირდაპირ თქვა, რომ კანონის დაცვას არ აპირებს. პრემიერის თქმით, ხელისუფლება უმრავლესობის მოთხოვნების შესაბამისად იმოქმედებს.
„ღარიბაშვილი, საჭადრაკო ენით რომ ვილაპარაკოთ, არის ცუგ-ცვანგში. ის არის იძულებული თქვას, რასაც ამბობს, რადგანაც იმისი აღიარება, რომ ის პირდაპირ არის პასუხისმგებელი ლექსო ლაშქარავას მკვლელობაში და ძალადობის წახალისებაში 5 ივლისს ნიშნავს იმას, რომ ღარიბაშვილმა, როგორც მინიმუმ, უნდა დატოვოს თანამდებობა. ეს რომ არ თქვას, მას უწევს სრულიად წარმოუდგენელი შეთქმულების თეორიების მოგონება.
ის, რასაც ღარიბაშვილი აკეთებს, უკიდურესად სახიფათო იმიტომ არის, რომ სწორედ ამ დღეებში ხდება საქართველოს გაფორმება ავტორიტარულ რეჟიმად, რომელიც ზღუდავს თავისუფლებებს. ღარიბაშვილმა ეს თავისუფლება უკვე შეუზღუდა ლგბტქ თემს. მან თქვა, რომ დაუშვებელია უმცირესობა აკეთებდეს იმას, რაც არ უნდა (ჰიპოთეტურ) 95% უმრავლესობას, ეს კი პირდაპირ ნიშნავს იმას, რომ საქართველოს პრემიერ-მინისტრი უქვემდებარებს გამოხატვის თავისუფლების ფუნდამენტურ პრინციპს წარმოსახვითი, მაგრამ არარეალური უმრავლესობის ნებას. ეს არის პირდაპირი ანონსი: დემოკრატია საქართველოში დამთავრდა,“ – გვითხრა ზაალ ანდრონიკაშვილმა.
პუბლიცისტისთვის საგულისხმო აღმოჩნდა პრემიერის გამოსვლის ის ნაწილი, სადაც მან კრიტიკულ მედიაზე ისაუბრა.
„ღარიბაშვილმა ეჭვქვეშ დააყენა მედიის თავისუფლება. ყველა ოპოზიციურ მედიას ის უწოდებს სააკაშვილის მიერ მართულს და ფაქტობრივად ამბობს, რომ მედიები მონაწილეობენ სახელმწიფო გადატრიალებაში. ეს ასევე ნიშნავს, რომ იქნება რეპრესიები მედიის წინააღმდეგ და ამ რეპრესიებს გაამართლებენ იმით, რომ ეს თავისუფალი მედია კი არაა, არამედ სახელმწიფო გადატრიალებაში მონაწილე სუბიექტი. ესეც არის დემოკრატიის დასასრულის ანონსი,“ – აცხადებს პუბლიცისტი.
ზაალ ანდრონიკაშვილი ყურადღებას ამახვილებს პრემიერის მხრიდან სიტყვების „ანტისახელმწიფოებრივი“ და „ანტიეკლესიურის“ ერთდროულად გამოყენებაზეც:
„ეს ნიშნავს, რომ ღარიბაშვილი ეკლესიას და სახელმწიფოს არ მიჯნავს ერთმანეთისაგან და აღვივებს კონფლიქტს რელიგიურ ნიადაგზე, როგორც მან უკვე გააკეთა 5 ივლისის განცხადებაში. ეს ნიშნავს, რომ სახელმწიფო დაადგება არა მარტო დემოკრატიის სახელმწიფო ინსტრუმენტებით მოშთობის გზას, არამედ კვლავაც გამოიყენებს მოძალადე ჯგუფებს ოპოზიციური პარტიების, მედიების და მოქალაქეების წინააღმდეგ.
ღარიბაშვილის გამოსვლა არის დიქტატურის ანონსი. ვინც ეს ვერ გაიგო დღეს, ხვალ გააგებინებს, ან გომელაურის სუსი, ან მათი და საპატრიარქოს მიერ მართული მოძალადე ჯგუფები,“ – უთხრა ზაალ ანდრონიკაშვილმა „ბათუმელებს“.
