აჭარის ტურიზმის დეპარტამენტში, სატრენინგო – საკონსულტაციო ცენტრში ტრენინგები დაიწყო. პირველი ტრენინგი, სასტუმრო „დივან სუითი“-ს ტრენერმა ჯეირან ბეჟანიძემ სასტუმროებისა და კვების ობიექტების დასუფთავების სამსახურის თანამშრომლებს ჩაუტარა.
ძირითადი აქცენტი სასტუმროებსა და კვების ობიექტებში დასუფთავების ხარისხის ამაღლებაზე და მინიმალური სტანდარტების დამკვიდრებაზე გაკეთდა.
ტურიზმის დეპარტამენტის ინფორმაციით, დეპარტამენტის სატრენინგო-საკონსულტაციო ცენტრი ერთდღიან ტრენინგებს სასტუმროების, რესტორნებისა და ტურსააგენტოების მოქმედი თანამშრომლებისთვის ყოველკვირეულად ჩაატარებს.
„საკონსულტაციო ცენტრის მიერ დაგეგმილი ტრენინგების შესახებ ინფორმაცია რეგულარულად განახლდება ვებგვერდზე: recommend.ge. სურვილის შემთხვევაში, ასევე შესაძლებელია დარგში არსებული პრობლემის აღმოფხვრის მიზნით, კერძო სექტორის წარმომადგენელმაც მიმართოს ცენტრს კონსულტაციის ან სასურველი ტრენინგის განხორციელების ინიციატივით,“-ნათქვამია დეპარტამენტის ინფორმაციაში.
ტურიზმის დეპარტამენტის ინფორმაციით, შეთავაზებული ტრენინგები და კონსულტაციები უფასოა და ხელმისაწვდომი კერძო სექტორის წარმომადგენლებისთვის.