საქართველოში კორონავირუსით ხელმეორედ ინფიცირების სამი დადასტურებული შემთხვევაა. დღეს, დაავადებათა კონტროლისა და საზოგადოებრივი ჯანმრთელობის ეროვნული ცენტრის სპეციალურ ბრიფინგზე, ცენტრის გადამდებ დაავადებათა დეპარტამენტის უფროსმა ხათუნა ზახაშვილმა თქვა, რომ დღეისთვის საქართველოში რეინფექციაზე საეჭვო 140-მდე შემთხვევაა რეგისტრირებული, მათ შრის 16-მდე შემთხვევაში კვლევა დასრულებულია და მათგან 3 შემთხვევაა დადასტურებული, “როდესაც ეს არის ნამდვილად რეინფექცია”.
ხათუნა ზახაშვილის განმარტებით, რეინფექციად განისაზღვრება ისეთი შემთხვევები, როდესაც ადამიანის ჭეშმარიტად ინფიცირდება ორჯერ თანმიმდევრულად ისე, რომ ერთ-ერთი შემთხვევა სრულად გამოჯანსაღდა და შემდეგ მეორედ დაინფიცირდა.
“ასეთი ადამიანების რაოდენობა მთელ მსოფლიოში მატულობს. როგორც ჩანს, ამ ვირუსის მიმართ იმ იმედით განწყობა, რომ მას ცოტა ან თითქმის არ ექნებოდა რეინფექციის შემთხვევები, არ აღმოჩნდა ჭეშმარიტი. ბოლო კვლევების მიხედვით მიჩნეულია, რომ სულ ცოტა უკვე გადატანილი შემთხვევების 0.68%-ის ხელმეორე ინფიცირება მოხდა და ასევე, დღეისთვის ცნობილია, რომ რიგ ქვეყნებში, სადაც თანმიმდევრული და მიზანმიმართული კვლევები მიმდინარეობს, ამ რეინფიცირების შემთხვევების რიცხვი შეიძლება იყოს კიდევ უფრო მეტი. ფაქტია, რომ ამ ვირუსით შეიძლება ადამიანი რამდენჯერმე დაავადდეს. შესაბამისად, ყველას მოგიწოდებთ ყურადღებისკენ”, – თქვა ხათუნა ზახაშვილმა.
