„დაბეჯითებით გეუბნებით, რომ ეს პანდემია არ გათავდება ერთ თვეში, ორ თვეში, სამ თვეში, ხუთ თვეში და შესაძლოა არც ერთ წელიწადში. ვირუსს აქვს თავისი ბიოლოგიური ციკლი, როცა ვირუსი თანდათან დასუსტდება და პანდემია სხვადასხვა გათვლებით ერთ წელიწადში შესაძლოა ჩაქრეს. ამასობაში ჩვენ გვიწევს მასთან ერთად ცხოვრება. ამას უნდა მივეჩვიოთ,“ – აღნიშნა დღევანდელ ბრიფინგზე ამირან გამყრელიძემ, დაავადებათა კონტროლის ეროვნული ცენტრის დირექტორმა.
ამირან გამყრელიძის თქმით, „შიდსი უკვე ჩაანაცვლა კოვიდმა,“ რადგან კორონავირუსით მსოფლიოში დაავადებულთა 10 პროცენტი მძიმე შემთხვევაა, 1 პროცენტი – კრიტიკული.
„…ვნახეთ, რომ უკვე 10 თვეა ვერ მოხდა გარღვევა, ვერც მკურნალობაში, არც ვაქცინა არ არის მიყვანილი ბოლომდე, რომელიც შეიძლება გამოიყენონ ფართო საზოგადოებაში… რჩება აქტიურად ეს ხუთი პრევენციული ღონისძიება, მათ შორის პირველი არის პირბადე,“ – თქვა ამირან გამყრელიძემ.
დღეს, 21 ოქტომბერს, ქვეყნის მასშტაბით კორონავირუსის 1351 ახალი შემთხვევა დაფიქსირდა, მათ შორის აჭარაში – 369.
ბოლო 24 საათის განმავლობაში საქართველოში კორონავირუსით გარდაცვალების ახალი ანტირეკორდი დაფიქსირდა – გარდაიცვალა 14 ადამიანი, მათ შორის ერთი 30 წლამდე ახალგაზრდა.
