ბათუმის ასფალტირებული და არაასფალტირებული ქუჩების შეკეთებაზე ტენდერები მერიის სამსახურებს ახლა აქვთ გამოცხადებული. ქალაქის ბიუჯეტიდან ამ სამუშაოებისთვის ჯამში 440 ათას 140 ლარია გამოყოფილი. სამუშაოების დაწყება კი, მიმდინარე ტენდერების დასრულებაზეა დამოკიდებული.
გზის პრობლემატურ მონაკვეთზე ბეტონის საფარის დაგების [ასფალტის დაკერების] სამუშაოებზე ტენდერი 299 ათას 840 ლარით აქვს გამოცხადებული მერიის საქალაქო ინფრასტრუქტურისა და კეთილმოწყობის სამმართველოს. წინადადებების მიღება 29 ივლისს დაიწყება და 3 აგვისტოს დასრულდება.
პირობის მიხედვით, ტენდერში გამარჯვებულმა ხელშეკრულების გაფორმებიდან 3 თვის განმავლობაში 1 538 კუბ/მ ბეტონის საფარი უნდა დააგოს გზების პრობლემურ მონაკვეთებში.
„თითოეულ ობიექტზე სამუშაოები უნდა განხორციელდეს მას შემდეგ, რაც ტენდერში გამარჯვებული პრეტენდენტი შემსყიდველის მხრიდან მიიღებს შეტყობინებას სამუშაოების დაწყების თაობაზე, რომელშიც განსაზღვრული იქნება სამუშაოების დაწყების კონკრეტული თარიღი და სამუშაოების შესრულების კონკრეტული ვადა კონკრეტულ ქუჩაზე ან მონაკვეთზე… შესრულებული სამუშაოების საგარანტიო პერიოდი შეადგენს 24 თვეს საბოლოო მიღება ჩაბარების აქტის გაფორმებიდან; ამ პერიოდის განმავლობაში ხარვეზის გამოვლენის შემთხვევაში, მიმწოდებელი ვალდებულია შემსყიდველის მიერ დადგენილ ვადაში მოახდინოს გამოვლენილი ხარვეზის აღმოფხვრა“, – აღნიშნულია ტენდერის პირობაში.
140 ათას 300 ლარით გამოაცხადა ტენდერი ბათუმის მერიის მუნიციპალური სერვისების სააგენტომ ქალაქში არაასფალტირებული ქუჩების სარემონტო სამუშაოებზე. ამ ტენდერში წინადადებების მიღება 5 აგვისტოს დაიწყება და 10 აგვისტოს დასრულდება.
გამარჯვებულმა, ხელშეკრულების გაფორმებიდან 2020 წლის 31 დეკემბრის ჩათვლით პერიოდში, უნდა შეასრულოს შემდეგი სამუშაოები:
-
- არაასფალტირებული ქუჩების შეკეთება ქვიშა-ხრეშოვანი ნარევით – ჯამში 90 000 კვ/მ;
- არაასფალტირებული ქუჩების შეკეთება (ქვიშა-ხრეშოვანი ნარევის გარეშე) – ჯამში 70 000 კვ/მ;
- არაასფალტირებულ ქუჩებსა და გზებზე უვარგისი გრუნტის ამოღება და ბუნებრივი ქვიშა-ხრეშოვანი ნარევით შევსება (დატკეპნით) – 240 კუბ/მ.
გამარჯვებულმა „მუნიციპალური სერვისების სააგენტოს მიერ მითითებული ქუჩების მოხრეშვა-მოშანდაგების შემდეგ მთელი წლის განმავლობაში უნდა უზრუნველყოს აღნიშნული ქუჩების გამართულ მდგომარეობაში ყოფნა. მიმწოდებელი ვალდებულია ჩაატაროს არაასფალტირებულ ქუჩებზე ორმოების კიდეების გაფხვიერების და დამუშავების სამუშაოები; მოახდინოს ბალასტით ორმოების შევსება, გასწორება-დატკეპნა, საჭიროების შემთხვევაში ზემოდან ქვიშა-ღორღოვანი ნარევით მოსწორება“.
ქალაქ ბათუმის ადმინისტრაციულ საზღვრებში შემოდის გზები, რომლებიც საქართველოს საავტომობილო გზების დეპარტამენტის დაქვემდებარებაშია. ასეთია, მაგალითად, ანგისა-ახალციხის გზის მონაკვეთი – ფრიდონ ხალვაშის გამზირი.
საქართველოს საავტომობილო გზების დეპარტამენტმა აჭარასა და გურიის რეგიონში საავტომობილო გზების პერიოდული შეკეთების სამუშაოებზე ტენდერი ახლახან გამოაცხადა, სადაც წინადადებების მიღება 7 აგვისტოს დაიწყება და 12 აგვისტოს დამთავრდება.
ტენდერში გამარჯვებულმა გზების დეპარტამენტის წერილობითი დავალების შესაბამისად, აჭარასა და გურიაში გზები ეტაპობრივად, ხელშეკრულების გაფორმებიდან 2 წლის განმავლობაში უნდა შეაკეთოს.
საავტომობილო გზების დეპარტამენტის მიერ გამოცხადებული ტენდერის მიხედვით, პრეისკურანტის სავარაუდო ღირებულება [სამუშაოების ჩამონათვალი და მათი ღირებულებების ჯამი] არის 37 201 ლარი, ხოლო შესყიდვის ობიექტის სახელშეკრულებო ღირებულებაა – 20 მილიონი ლარი.
